வானுார்: ஆரோவில் அருகே உள்ள கோவிலில் புதிதாக ஒரு சிலையை மர்ம ஆசாமிகள் கொண்டு வந்து வைத்துள்ள சம்பவம் அப்பகுதி மக்களிடையே பரபரப்பை ஏற்படுத்தியுள்ளது.

விழுப்புரம் மாவட்டம், ஆரோவில் அருகே கோட்டக்கரை கிராமத்தில் பொறையாத்தம்மன் கோவில் அமைந்துள்ளது. இந்த கோவில் கருவறையில், 2 அடி உயரமுள்ள பொறையாத்தம்மன் சிலை இருந்தது. கடந்த செப்., 29ம் தேதி கோவில் கருவறையில் இருந்த சிலையை மர்ம நபர்கள் எடுத்து சென்று, 2 கி.மீ., தொலைவில் உள்ள இளங்காளியம்மன் கோவிலில் வைத்து பூஜை செய்துள்ளனர். இது குறித்து ஆரோவில் போலீசில் புகார் அளிக்கப்பட்டது. இந்நிலையில், நேற்று பொதுமக்கள், கோட்டக்கரை இளங்காளியம்மன் கோவிலுக்கு சென்றபோது, கோவில் எதிரில், புதிதாக ஒரு கற்சிலை வைக்கப்பட்டிருப்பதை பார்த்து அதிர்ச்சியடைந்தனர். இது குறித்து தகவலறிந்த அப்பகுதி மக்கள் அங்கு திரண்டனர். இந்த சிலையை யார், எதற்காக இங்கு கொண்டு வந்து வைத்தனர் என தெரியாததால், இது குறித்து ஆரோவில் போலீசுக்கு தகவல் தெரிவித்தனர். இந்த சம்பவம் தொடர்பாக போலீசார் விசாரணை நடத்தி வருகின்றனர்.