மேலூர்: சூரக்குண்டில் எல்லா வளமும் கிடைக்க வேண்டி கிராமத்தினர் சுவாமி சிலை எடுத்தும், கிடாவெட்டி பொங்கல் வைத்து நேர்திக்கடன் செலுத்தினர்.

இக் கிராமத்தில் உள்ள சின்னடைக்கி பெரியடைக்கி மற்றும் ஆண்டி அரசன் மகன் கோயில் புரட்டாசி மாத திருவிழா இன்று நடந்தது. இத் திருவிழாவை முன்னிட்டு கிராம மக்கள் மந்தையில் ஒன்று கூடினர். கிராமத்து பெரியவர்கள் முன்னே நடந்து செல்ல பெண்கள் பொங்கல் வைப்பதற்கான பூஜை பொருட்களை பித்தளை கலையத்திலும், மாவிளக்கு வைப்பதற்கான பொருட்களை சில்வர் பாத்திரத்திலும், சுவாமி சிலைகளையும் இரண்டு கி.மீ., தொலைவில் உள்ள கோயிலுக்கு குலவையிட்டபடி சுமந்து சென்று நேர்த்திக்கடன் செலுத்தினர். அங்கு எல்லா வளமும் கிடைக்க வேண்டி கிடாவெட்டி பொங்கல் வைத்து படையலிட்டனர். பாரம்பரியமாக பொங்கல் விழா கொண்டாடுவதாக கிராமத்தினர் தெரிவித்தனர். இத் திருவிழாவில் பெரிய,சின்ன சூரக்குண்டு, அய்யர்பட்டி உள்ளிட்ட கிராமங்களை சேர்ந்த ஆயிரத்திற்கும் மேற்பட்டோர் கலந்து கொண்டனர்.