சிவபெருமான் நவராத்திரி விரதத்தை கடைப்பிடித்தே, திரிபுர தகனம் செய்தார் என்று புராணங்களில் செய்தி உண்டு. நவராத்திரியில் பூஜிப்பவர்களுக்கு, சகல நலங்களையும் தருவேன் என, அம்பிகையே அருள்பாலிக்கிறாள்.  இன்று அம்பிகையை மகிஷாசுரனை வதம் செய்த ராஜராஜேஸ்வரியாக அலங்காரம் செய்ய வேண்டும்.  கோதுமை மாக்கோலம் இட்டு தயிர்வடை, வேர்க்கடலை, சுண்டல், எள்சாதம், புளியோதரை நைவேத்யம் செய்து அம்மனை வழிபட வேண்டும். 

நவராத்திரி இரண்டாம் நாளான இன்று, மகிஷனை வதம் செய்ய புறப்படும் வராஹி வடிவத்தில், ராஜராஜேஸ்வரி தோற்றமளிப்பாள். வராஹி நந்த நாதருக்கு, வராஹி ரூபத்தில் தோற்றமளித்ததால், இந்தப்பெயர் ஏற்பட்டது. ஈசனின் பாதியாக இருப்பதால், பக்தர்களின் இடர்களை களைந்து காப்பாற்றுபவளாக இருக்கிறாள். சகல வளங்களையும் கொடுப்பவள் என, நம்பப்படுகிறது. அதனாலேயே, சூலமும், உலக்கையும் இவளின் ஆயுதங்களாய் உள்ளன. புரட்டாசி சோமவாரமான இன்று, அம்மனை வழிபடுவது சிறப்பு வாய்ந்தது. பிற நாட்களை விட இந்த நாளில் வழிபடுவது, பலமடங்கு பலன்களை தரும். அம்மனை முல்லை மலரால் அலங்கரித்து, துளசி இலையினால் அர்ச்சனை செய்ய வேண்டும். வாசமிக்க மருவு இலையையும் இணைத்துக் கொள்வது நல்லது.கோதுமை மாவினால், கட்டம் கோலம் போட வேண்டும். நிவேதனத்துக்கு, மாம்பழம் வைப்பது நல்லது. காலை, புளி சாதம் படைக்கலாம்; மாலை, தேங்காய், மாங்காய், பட்டாணி சுண்டல் செய்து, பிரசாதமாய் கொடுக்கலாம். நவராத்திரியின் ஒவ்வொரு நாளும், நவ தானியங்களால் சுண்டல் செய்து கொடுத்து, நாமும் சாப்பிடுவது, அந்த பருவ காலத்தில், சீதோஷ்ண மாற்றத்தால் வரும் தோல் பிரச்னைகளை சரிசெய்வதற்கும் ஏற்றது என்பதை, ஆன்மிகத்தோடு, அறிவியலாகவும் தெரிந்து கொள்வோம். நம் சொந்த குழந்தையாக இல்லாமல், பிறர் வீட்டு குழந்தைகளை வரவழைத்து அலங்கரித்து, திருமூர்த்தியாக பாவிக்கலாம். இன்று கொலுவில் வீற்றிருக்கும் அம்பாளை வழிபட நோய் தீரும். ஆரோக்கியம் உண்டாகும்!