மதுரை: மதுரை ஜீவா நகர் அருகே உள்ள தென்றல் நகர் பகுதியில், பொதுப்பணித்துறை அதிகாரி அசோகன் – ராஜலட்சுமி தம்பதியினர் கடந்த 25 ஆண்டுகளாக நவராத்திரி கொலு மண்டபத்தை அமைத்து வருகின்றனர். ஆரம்பத்தில் 5 படிகளில் தொடங்கிய இந்தக் கொலு, தற்போது 136 படிகளுடன் 5,000-க்கும் மேற்பட்ட வண்ணமயமான பொம்மைகள் இடம்பெறும் பிரம்மாண்டக் கொலுவாக உருவெடுத்துள்ளது.

நவராத்திரி விழாவை முன்னிட்டு, அசோகனின் குடும்பத்தினர் சுமார் 15 நாட்களாகக் கொலு படிகளை அமைத்து, பொம்மைகளை அடுக்கி அலங்கரிக்கும் பணியில் ஈடுபட்டனர். இந்தக் கொலு மண்டபத்தில் ஆன்மிகம், புராணம், வரலாறு, அரசியல், பாரம்பரியம், குழந்தைகளுக்கான பொழுதுபோக்கு எனப் பல்வேறு அம்சங்கள் தத்ரூபமாகக் காட்சிப்படுத்தப்பட்டுள்ளன.

புராணக் கதைகளை விளக்கும் பிரம்மாண்டக் கொலு!

பெருமாளின் பத்து அவதாரங்கள், விநாயகர், நந்தி, மீனாட்சி அம்மன் தேர், கள்ளழகர் வைகை ஆற்றில் இறங்கும் நிகழ்வு, அத்திவரதர், நவநாயகிகள், கிருஷ்ணரின் கோபியர்கள் உள்ளிட்ட பல்வேறு ஆன்மிகக் காட்சிகள் இடம்பெற்றுள்ளன. மேலும், இந்த ஆண்டில் மதுரை மீனாட்சி அம்மன் கோயில் கும்பாபிஷேகம், கஜேந்திர மோட்சம், நவதிருப்பதி, ஸ்ரீரங்கம் பெருமாள் – துலுக்க நாச்சியார் கதை, முருகப்பெருமானின் அறுபடை வீடுகள், சித்தர்கள், முனிவர்கள், நரசிம்மர், பள்ளிகொண்ட பெருமாள் உள்ளிட்ட பல்வேறு சிறப்புக் காட்சிகளும் அமைக்கப்பட்டுள்ளன. ராமாயணம், மகாபாரதம், சிவபெருமானின் திருவிளையாடல்கள் உள்ளிட்ட புராணக் கதைகளை விளக்கும் பொம்மைகளும் பார்வையாளர்களைக் கவர்கின்றன. மைசூர் மகாராஜாவின் பவனி, மீனாட்சி அம்மன் தேர் போன்ற வரலாற்று மற்றும் பண்பாட்டுச் சிறப்புமிக்க காட்சிகளும் இடம்பெற்றுள்ளன.

மத ஒற்றுமையைப் பறைசாற்றும் கொலு!

அனைத்து மதங்களும் அன்பையும் ஒற்றுமையையும் வலியுறுத்துகின்றன என்பதை உணர்த்தும் வகையில், பைபிள், குர்ஆன், பகவத்கீதை உள்ளிட்ட புனித நூல்களும் கொலுவில் இடம்பெற்றுள்ளன. மேலும், மக்கா, மதினா மற்றும் இயேசு பிறப்பைக் குறிக்கும் குடில் போன்றவையும் காட்சிப்படுத்தப்பட்டுள்ளன. இந்தக் கொலு மண்டபத்தைப் பார்வையிட இஸ்லாமியர்களும் கிறிஸ்தவர்களும் ஆர்வத்துடன் வருகை தருகின்றனர். இதன் மூலம் மத நல்லிணக்கத்தையும் சகோதரத்துவத்தையும் எடுத்துரைக்கும் வகையில் இந்தக் கொலு அமைந்துள்ளது.

அரசியல் தலைவர்கள் முதல் கார்ட்டூன் பொம்மைகள் வரை!

ஆன்மிகக் காட்சிகளுக்கு இணையாக, அம்பேத்கர், இந்திரா காந்தி, அண்ணா, முத்துராமலிங்கத் தேவர், எம்.ஜி.ஆர்., ஜெயலலிதா உள்ளிட்ட அரசியல் தலைவர்களின் உருவப் பொம்மைகளும் தத்ரூபமாக அடுக்கி வைக்கப்பட்டுள்ளன.

குழந்தைகளைக் கவரும் வகையில் மோட்டு பட்லு, சோட்டா பீம் போன்ற கார்ட்டூன் பொம்மைகள், கிரிக்கெட் காட்சிகள், பூங்காக்கள், பாட்டிக் கதைகள் மற்றும் பாரம்பரிய விளையாட்டுகள் ஆகியவையும் இடம்பெற்றுள்ளன. திருமண வைபவம், வளைகாப்பு, குழந்தைப் பிறப்பு, காது குத்துதல் போன்ற இல்ல விழாக்களைச் சித்தரிக்கும் பொம்மைகள் மூலம் தமிழர்களின் பாரம்பரிய வாழ்க்கை முறையும் விளக்கப்பட்டுள்ளது.

நண்பர்களின் பங்களிப்பில் உருவாகும் மத நல்லிணக்கக் கொலு!

இதுகுறித்து அசோகன் கூறுகையில், “எங்கள் வீட்டுக் கொலுவில் இடம்பெற்றுள்ள பெரும்பாலான பொம்மைகளை எனது இஸ்லாமிய நண்பர் அஸ்ரப் வழங்கி வருகிறார். கொலு மண்டபத்தின் அலங்காரப் பணிகளை எனது கிறிஸ்தவ நண்பர் செய்து கொடுக்கிறார். எங்கள் வீட்டுக் கொலு மண்டபத்தைப் பார்வையிட ஏராளமான இஸ்லாமியர்களும் கிறிஸ்தவர்களும் ஆர்வத்துடன் வருகின்றனர். வீட்டிற்கு வரும் பார்வையாளர்களுக்கு இயற்கை உணவுகள் பிரசாதமாக வழங்கப்படுகின்றன. ஆரம்பத்தில் 5 படிகளில் தொடங்கிய கொலு, இன்று 136 படிகளுடன் 5,000-க்கும் மேற்பட்ட பொம்மைகளைக் கொண்ட பிரம்மாண்டக் கொலுவாக வளர்ந்துள்ளது. கொலு அமைப்பதற்கு மட்டுமல்லாமல், நவராத்திரி முடிந்த பிறகு பொம்மைகளைச் சேதமின்றிப் பாதுகாப்பதும் சவாலான பணியாக உள்ளது. கைவினைக் கலைஞர்களுக்கு வாழ்வாதாரம் கிடைக்க வேண்டும் என்பதற்காகக் கொலுப் படிகளை அமைப்பதிலும் ஆர்வம் காட்டி வருகிறேன். சிறுவர்களுக்குப் புரியும் வகையில் வரலாற்றுக் கதைகளையும் இந்து புராணங்களையும் பொம்மைகள் மூலம் தத்ரூபமாக விளக்குகிறோம். எங்கள் கொலு மண்டபம் மத ஒற்றுமையையும் மனிதநேயத்தையும் எடுத்துரைக்கும் இடமாக அமைந்துள்ளது” என்றார். 25 ஆண்டுகளாகத் தொடரும் இந்த நவராத்திரி முயற்சி, ஆன்மிகத்தையும் பாரம்பரியத்தையும் மட்டுமின்றி, கலைஞர்களின் உழைப்பையும் மத நல்லிணக்கத்தையும் ஒருங்கே வெளிப்படுத்தும் சிறப்புமிக்க நிகழ்வாகத் திகழ்கிறது.