ஊத்துக்கோட்டை: சுருட்டப்பள்ளி பள்ளிகொண்டேஸ்வரர் கோவிலில், பக்தர்கள் காணிக்கையாக செலுத்திய பணம், 3,01,497 ரூபாய் வசூல் ஆனது. ஊத்துக்கோட்டை அடுத்த, சுருட்டப்பள்ளி பள்ளிகொண்டேஸ்வரர் கோவிலில், சிவப்பெருமான் உருவ ரூபத்தில் பக்தர்களுக்கு அருள்பாலிக்கிறார். பிரதோஷம், சிவராத்திரி மற்றும் விடுமுறை நாட்களில், அதிகளவில் பக்தர்கள் வந்து சுவாமியை தரிசனம் செய்வர். சுவாமியை தரிசிக்க வரும் பக்தர்கள், தங்களது வேண்டுதல்களை காணிக்கையாக செலுத்த கோவில் நிர்வாகம் சார்பில், பள்ளிகொண்டேஸ்வரர், அன்னை மரகதாம்பிகை மற்றும் கோவில் வளாகங்களில், 10 உண்டியல்கள் வைக்கப்பட்டு உள்ளன. நேற்று முன்தினம், இந்த உண்டியல்களில் உள்ள பணம் எண்ணும் பணி நடந்தது. கோவில் மேலாளர் சுப்பிரமணியம் தலைமையில், சித்தூர் மாவட்ட கோவில்கள் குழு மூத்த அதிகாரி சாஸ்திரி முன்னிலையில், கோவில் ஊழியர்கள், பக்தர்கள் உள்ளிட்டோர் பணத்தை எண்ணும் பணியில் ஈடுபட்டனர். அதில் பக்தர்கள் காணிக்கையாக செலுத்திய பணம், 3,01,497 ரூபாய் இருந்தது. இது, கடந்த ஒரு மாதத்தில், பக்தர்கள் செலுத்திய பணம் என்பது குறிப்பிடத்தக்கது.