மாமல்லபுரம்: திருவிடந்தை நித்ய கல்யாண பெருமாள் கோவிலில், சித்திரை பிரம்மோற்சவ விழா நாளை மறுநாள் (ஏப்., 24ம் தேதி) துவங்குகிறது. மாமல்லபுரம் அடுத்த திருவிடந்தையில், நித்ய கல்யாண பெருமாள் கோவில் உள்ளது. இத்தலத்தில், ஆதிவராகப்பெருமாள், தமது இடது தொடையில், அகிலவல்லி தாயாரை இருத்தி, நின்ற கோலத்தில் காட்சியளிக்கிறார். காலவ முனிவரின், 360 மகள்களை, தினம் ஒருவர் வீதம், சுவாமி திருமணம் செய்ததால், இக்கோவில் திருமண தடை, ராகு, கேது, சுக்ர நிவர்த்தி பரிகார தலமாக விளங்குகிறது. 108 வைணவ தலங்களில், 62வது தலமாக புகழ்பெற்றது. திருமங்கை ஆழ்வார் போற்றிப் பாடிஉள்ளார். இங்கு, ஆண்டுதோறும், சித்திரை பிரம்மோற்சவ விழா கொண்டாடப்படுகிறது. இந்தாண்டிற்கான விழா, வரும் 24ம் தேதி துவங்கி, அடுத்த மாதம் 3ம் தேதி வரை நடைபெறுகிறது. இதையொட்டி, 23ம் தேதி மாலை, அங்குரார்ப்பணம் நடத்தி, 24ம் தேதி காலை 10:00 மணிக்கு கொடி ஏற்றத்துடன் விழா துவங்குகிறது.