ராசிபுரம்: கைலாசநாதர் கோவிலில் சித்தரை தேர்த்திருவிழா கோலாகலமாக நடந்தது. சுற்று வட்டாரத்தை சேர்ந்த ஏராளமான பக்தர்கள் பங்கேற்று, ஸ்வாமியை வழிபட்டனர். ராசிபுரத்தில், பிரசித்தி பெற்ற கைலாசநாதர் கோவில் உள்ளது. இங்கு, ஸ்வாமி தர்மசம்வர்த்தினியுடன் எழுந்தருளி, பக்தர்களுக்கு அருள்பாலிக்கிறார். இக்கோவிலில் ஆண்டுதோறும் சித்திரை மாதம் தேர்த்திருவிழா கோலாகலமாக கொண்டாடப்படுவது வழக்கம்.இந்த ஆண்டு விழா, கடந்த, 15ம் தேதி கிராம சாந்தியுடன் துவங்கியது. தொடர்ந்து, நேற்று முன்தினம் மாலை, 5 மணிக்கு திருக்கல்யாண உற்சவம் நடந்தது. நேற்று அதிகாலை, 5 மணிக்கு, மகா அபிஷேகம், 7 மணிக்கு ஸ்வாமி அலங்கரிக்கப்பட்ட திருத்தேருக்கு எழுந்தருளினார்.மாலை, 4 மணிக்கு, நகராட்சி சேர்மன் பாலசுப்ரமணியம், துணைத் தலைவர் வெங்கடாஜலம், கோவில் செயல் அலுவலர் ராஜாராம் உள்ளிட்டோர் முன்னிலையில், தேர் வடம் பிடித்து இழுக்கப்பட்டது.திருத்தேர் ராஜவீதி வழியாக சென்று, கடைவீதியில் நிறுத்தப்பட்டது. நான்கு நாட்கள் நடக்கும் திருத்தேரோட்ட நிகழ்ச்சியில், பக்தர்களுக்கு அன்னதானம் வழங்கப்படுகிறது.இன்று (ஏப்., 26) தேர் நிலை சேர்கிறது. ஏப்ரல், 29ம் தேதி மாலை, 6 மணிக்கு சத்தாபரணம், 30ம் தேதி நடராஜர் ஸ்வாமிக்கு அபிஷேகம் நடக்கிறது.