சின்னசேலம்: சின்னசேலம் விஜயபுரம் வேதவல்லி மாரியம்மன் கோவில் கும்பாபிஷேகம் நேற்று நடந்தது.விழாவையொட்டி யாக சாலை பூஜைகளுடன் துவங்கி காலை 7: 30 மணிக்கு மங்கள இசை ஆச்சாரிய விசேஷ சாந்தி, இரண்டாம் கால பூஜைகள், மூர்த்தி ஹோமங்கள், பூர்ணாஹூதி, சதுர்வேத வாராயனம், மந்திர புஸ்பம் நடந்தது. அதைத்தொடர்ந்து மூன்றாம் கால பூஜைகள் விழா கமிட்டி தலைமையில் நடத்தப்பட்டது. இதில் திருச்சி சிவாச்சாரியார் ஜம்புலிகேஸ்வரர் தலைமையில் யாக சாலை பூஜை நடந்தது. சரச ராமம், கோ பூஜை மற்றும் மாரியம்மன், விநாயகர், முருகன், காத்தவராயன், சின்னான் மற்றும் நவக் கிரக மூர்த்தி ஹோமம் நடந்தது.காலை 9:10 மணிக்கு கோபுர கலசங்களுக்கு புனிதநீரூற்றி, சிவாச்சாரியார்கள் கும்பாபிஷேகம் செய்தனர்.கள்ளக்குறிச்சி ஆர்.டி.ஓ., ராஜசேகரன், சின்னசேலம் தாசில்தார் வைகுண்டவரதன், மின்வாரிய செயற்பொறியாளர் அமலோற்பவநாதன், விழா கமிட்டி தலைவர் நெடுஞ்செழியன் மற்றும் நிர்வாகிகள், பக்தர்கள் பங்கேற்றனர். இதையடுத்து சித்ரா பவுர்ணமி குழுவினர் அன்னதானம் வழங்கினர்.