திருவள்ளூர்: வீரராகவர் கோவிலில், பிரம்மோற்சவ விழாவை ஒட்டி நேற்று காலை தீர்த்தவாரி நடைபெற்றது. திருவள்ளூரில், அகோபில மடம் ஆதீனம் பரம்பரை மிராசைச் சேர்ந்த வீரராகவர் கோவிலில் பத்து நாள் பிரம்மோற்சவ விழா நடைபெற்று வருகிறது. தினமும், இரு வாகனங்களில் பெருமாள் புறப்பாடு நடைபெற்று வருகிறது. நிகழ்ச்சியின், ஒன்பதாவது நாளான நேற்று காலை, 4:30 மணிக்கு ஆள்மேல் பல்லக்கில் வீரராகவர் பெருமாள் புறப்பாடு நடைபெற்றது. அதன் பின்னர், காலை, 10:30 மணிக்கு தீர்த்தவாரி நடைபெற்றது. இதையொட்டி, ஹ்ருத்தாபநாஸிநி தீர்த்தக் குளத்தில் சக்கரத்தாழ்வாருடன், உற்சவர் வீரராகவர் புனித நீராடினார். அதைத் தொடர்ந்து, ஏராளமான பக்தர்கள் குளத்தில் புனித நீராடினர். மாலை, 3:00 மணிக்கு திருமஞ்சனம் நடைபெற்றது. இரவு, 7:00 மணிக்கு பத்தி உலாவும், இரவு, 8:00 மணிக்கு விஜயகோடி விமானத்தில் உற்சவர் புறப்பாடும் நடைபெற்றது. இரவு, 10:30 மணிக்கு திருமொழி சாற்றுமறை முடிந்து ரத்னாங்கி சேவையில் உற்சவர் ஸ்ரீதேவி, பூதேவி சமேதரராக அருள் பாலித்தார்.