காரிமங்கலம்: காரிமங்கலம் அருகே பழமை வாய்ந்த சிவன் கோவிலில் நீண்ட காலத்துக்கு பின் பக்தர்களின் முயற்சியால் பூஜை நடந்தது.காரிமங்கலம் அடுத்த அடிலம் பஞ்சாயத்துக்கு உட்பட்ட கவுண்டர் கொட்டாயில் சிவன் கோவில் உள்ளது. ஆயிரம் ஆண்டுகள் பழமை வாய்ந்த இக்கோவிலில் பூஜைகள் தொடர்ச்சியான முறையில் நடக்காததால், நீண்ட காலமாக கோவில் பாழடைந்து காணப்பட்டது. இதையடுத்து பக்தர்கள் முயற்சியால் கோவில் தூய்மை செய்யப்பட்டு பூஜை நடத்த ஏற்பாடு செய்யப்பட்டது.சித்ரா பவுர்ணமி அன்று பல சிவனடியார்கள் தலைமையில் கணபதி ஹோமுமும், ஸ்வாமிக்கு சிறப்பு அபிஷேகம், அலங்காரம், பூஜைகள் நடந்தது. பக்தர்களுக்கு அன்னதானம் வழங்கப்பட்டது.அ.தி.மு.க., ஒன்றிய செயலாளர் குமார், பஞ்சாயத்து தலைவர் வக்கீல் மகேஸ்குமார், முன்னாள் பஞ்சாயத்து தலைவர்கள் பெருமாள், சென்னகேசவன், நாகராஜ் உட்பட பலர் கலந்து கொண்டனர். ஏற்பாடுகளை அடிலம் பஞ்சாயத்து தலைவர் அன்பழகன் மற்றும் ஊர் பொதுமக்கள் செய்திருந்தனர்.