தென்காசி: தென்காசி குலசேகரநாதர் கோயிலில் பரமரிக்கப்படாத சுவரில் வளர்ந்துள்ள செடிகளால் அபாயம் ஏற்பட்டுள்ளது. உடனடியாக அகற்ற வேண்டும் என பொதுமக்கள் மற்றும் பக்தர்கள் கோரிக்கை விடுத்துள்ளனர். தென்காசி பழைய ஆஸ்பத்திரி அருகே பிரசித்தி பெற்று விளங்கும் குலசேகரநாதர் சிவன் கோயில் உள்ளது. இங்கு தினமும் நித்திய கால பூஜைகள் மற்றும் சகல விஷேசங்களும் நடந்து வருகிறது. மேலும் இக்கோயிலில் சிவராத்திரி வெகுசிறப்பாக கொண்டாடப்படுகிறது. தற்போது இந்த கோயில் நிர்வாக அதிகாரிகளின் கவனக்குறை காரணமாக கோயில் சுற்று சுவரிலும் முகப்பு சுவர்களிலும் செடிகள் வளர்ந்து ஏற்பட்ட விரிசலில் இருந்து இந்த சுவர் பாழடைவதுடன் சுவர் இடியும் அபாயமும் ஏற்படும். இப்பிரச்னையை கருத்தில் கொண்டு சம்பந்தப்பட்ட அதிகாரிகள் உடனே நடவடிக்கை எடுத்து கோயிலை சீர் செய்வதுடன் தொடர்ந்து பராமரித்து வர நடவடிக்கை எடுக்க வேண்டும் என பொதுமக்கள் மற்றும் பக்தர்கள் கேட்டு கொண்டுள்ளனர்.