பரமக்குடி: பரமக்குடி மீனாட்சி சுந்தரேஸ்வரர் கோயிலில் சித்திரைத் திருவிழா நேற்று கொடியேற்றத்துடன் துவங்கியது. விழாவையொட்டி, தினமும் சுவாமி-அம்பாள் பல்வேறு வாகனங்களில் எழுந்தருளி அருள்பாக்கின்றனர்.இக்கோயிலில் 12 நாட்கள் நடைபெறும் இத்திருவிழாவில் தினமும் காலை, மாலையில் சுவாமி- அம்பாளுக்கு சிறப்பு பூஜை நடக்கிறது. இதையொட்டி, நேற்று காலை 9.30 மணிக்கு கொடியேற்றம் நடந்தது. இரவு 7 மணிக்கு மேல் சுவாமி - அம்பாள் சிம்மாசனத்தில் எழுந்தருளி வீதியுலா வந்தனர். விழாவையொட்டி, தினமும் காலை, மாலையில் கிளி, பூத, சிங்க, குதிரை, கைலாச, காமதேனு, வெள்ளி ரிஷபம், நந்திகேஸ்வரர், அன்னம் உள்ளிட்ட பல்வேறு வாகனங்களில் சுவாமி- அம்பாள் எழுந்தருளி பக்தர்களுக்கு அருள்பாலிக்கின்றனர். முக்கிய நிகழ்ச்சியாக மே 8 ல், பிச்சாண்டவர் புஷ்பச் சப்பரத்திலும், மே 9 ல், இந்திர விமானத்தில் சுவாமி வீதியுலாவும், இரவு திருக்கல்யாண மண்டபத்தில் சீர்வரிசை நிகழ்ச்சியும் நடக்கிறது. மே 10ல், மாலை 5 மணிக்கு மாப்பிள்ளை அழைப்பு ஊர்வலத்துடன், 6.15 மணிக்கு மீனாட்சி - சுந்தரேஸ்வரர் திருக்கல்யாணமும், மாலை புஷ்ப பல்லக்கில் வீதியுலா நடைபெறும். மே 11ல், காலை 9 மணிக்கு தேரோட்டம், மறுநாள் தீர்த்தவாரியும், மாலை ரிஷப வாகனத்தில் வீதியுலாவுடன் கொடியிறக்கம் நிகழ்ச்சி நடக்கிறது. மே 13 ல், காலை 12 மணிக்கு உற்சவ சாந்தியுடன் விழா நிறைவடைகிறது. ஏற்பாடுகளை தேவஸ்தான டிரஸ்டிகளுடன், ஆயிர வைசிய சபையினர் செய்து வருகின்றனர்.