தேவாரம்: தேவாரம் செல்லாயி அம்மன் கோயில் திருவிழாவில் நான்கு கிராம மக்கள் கலந்து கொண்டு நேர்த்தி கடன் செலுத்தினர். தேவாரம் சின்னதேவி கண்மாய் அருகே செல்லாயி அம்மன் கோயில் அமைந்துள்ளது. புரட்டாசியில் நடைபெறும் திருவிழாவில் தேவாரம், திடீர்புரம், செல்லாயிபுரம், தம்மிநாயக்கன்பட்டியை சேர்ந்த பக்தர்கள் கலந்து கொள்வார்கள். மழைபெய்து, சின்னதேவி கண்மாய்க்கு வரும் வெள்ளநீரில் பொங்கல் வைக்க வேண்டும் என்பது ஐதீகம். கோயில் பொங்கல் வைக்கும் போது தேவாரம் பகுதியில் பலத்த மழை பெய்தது. ஐதீகப்படி வெள்ளநீரெடுத்து பொங்கல் வைக்க பயன்படுத்தப்பட்டது. பெண்கள் முளைப்பாரி சுமந்து நேர்த்தி கடன் செலுத்தினர். கலை நிகழ்ச்சிகள் நடைபெற்றன. ஏற்பாடுகளை தேவாரம் தேவேந்திர வேளாள குல சமூகத்தினர் செய்திருந்தனர்.