தர்மத்தாலும், கருணையாலும் பெறப்படும் வெற்றியே நிலைபெற்று நிற்கும். அதர்மத்தை தர்மத்தாலும், தீமையை நன்மையாலும் தான் வெல்ல முடியும். தொழிலில் வல்லவனை வெற்றி தேடிவரும். வலிமை இல்லாதவன் தோற்றுப் போவான். மனதில் உறுதி வேண்டும். வாக்கினிலே இனிமை வேண்டும். நினைவிலே நல்லது வேண்டும். நோயற்ற உடலும், நுõறாண்டு வாழ்நாளும் வேண்டும். அச்சம் இல்லாத அமைதி எப்போதும் மனதில் குடியிருக்க வேண்டும். தன்னை வென்றவனுக்கு மட்டுமே வாழ்வில் பெருமை, வெற்றி, மேன்மை எல்லாம் கிடைப்பது சாத்தியம். பாவத்தை பாவத்தாலேயே வெல்ல நினைப்பது அறியாமை. பாவத்தை புண்ணியத்தால் வெல்ல முயலுங்கள். துணி வெளுக்க உவர் மண் இருக்கிறது. தோல் வெளுக்கச் சாம்பல் உண்டு. ஆனால், மனிதனின் மனதை வெளுக்க மட்டும் வழியில்லை. விவேகமே இந்த உலகில் எல்லாவிதமான செல்வங்களுக்கும் ஆதாரமாக இருக்கிறது. விவேகமில்லாத மனிதன் பார்வை இழந்தவர்களுக்குச் சமமானவர்கள்.  திருமண பந்தம் புனிதமானது. அதை நிரந்தரமாகப் பாதுகாப்பதே மனித நாகரிகம்.விவாகரத்து செய்யும் விஷயத்தில் யாரும் அவசரப்படக் கூடாது.  எதை மனிதன் விரும்புகிறானோ அதுவே நடக்கிறது. எதை ஆதரிக்கிறானோ அதுவே வளர்ச்சி பெறுகிறது. பேணாத எதுவும் அழிந்து போகும்.  பணக்கவலையும், மனக்கவலையுமே மனிதனுக்கு நோயாக வெளிப்படுகின்றன.  விதியின் முடிவு எப்படிப் பட்டதாக இருந்தாலும் கவலை வேண்டாம். அதை வெல்லும் சக்தி தெய்வபக்திக்கு உண்டு. ஆபத்து வரும்போதுநடுங்குபவன் மூடன். ஆபத்துக் காலத்திலும் யாருடைய உள்ளம் நடுங்காமல் துணிவுடன்செயலாற்றி, அதை போக்க முயற்சி செய்கிறானோ அவனே ஞானி. செல்வம் ஒரே இடத்தில் குவியக் கூடாது. பலரிடமும் பொருள் பரவியிருக்கும்படி செய்வதே மேன்மையானது. விதிப்படி இந்த உலகம் நடக்கிறது. மனித வாழ்க்கை இந்த உலகத்தின் வாழ்க்கையிலே ஒரு சிறுபகுதி. விதி தவறி ஒன்றும் நடக்காது.  விதியை நம்பி, விதை விதைக்காவிட்டால் பயிர் விளைவதில்லை. விதியை நம்பும் அதே நேரத்தில், உழைக்கவும் தயங்கக் கூடாது.  இன்று புதிதாய்ப் பிறந்தோம் என்ற எண்ணத்தை நெஞ்சில் பதித்துக் கொண்டு, இன்பமுடன் வாழுங்கள். உள்ளிருக்கும் தத்துவப் பொருள் புரியாமல், வெறுமனே கதை சொல்லி வழிபடுவோருக்கு தெய்வம் வரம் கொடுப்பதில்லை. பயம், துயரம், கவலைஇல்லாமல் இருந்தால், எந்த காலத்திலும் சாகாமல் நிரந்தரமாக வாழ முடியும்.  உயிர்களை நேசியுங்கள். தெய்வம் உண்மை என்பதை உணருங்கள். மனதை உறுதிப்படுத்துங்கள். இதுவே வாழும் முறை. நீண்டவயது, நோயின்மை, அறிவு, செல்வம் இந்த நான்கும் தந்தருளும்படி கடவுளிடம் மன்றாடிக் கேளுங்கள்.

 (மகான் பாரதியார்)