திருப்போரூர் : திருப்போரூர் கந்தசாமி கோவிலில், வரும், 12ம் தேதி முதல், பிரம்மோற்சவ விழா நடைபெற உள்ளது. காஞ்சிபுரம் மாவட்டம், திருப்போரூர், கந்தசாமி கோவிலில், ஆண்டுதோறும் பிரம்மோற்சவ விழா வெகு விமரிசையாக நடைபெறும். அதுபோல் இந்த ஆண்டும் நடத்துவது என, கோவில் நிர்வாகத்தாரால் முடிவு செய்யப்பட்டு, வரும், 12ம் தேதி விநாயகர் உற்சவத்துடன் விழா துவங்க உள்ளது.கொடியேற்றத்துடன், 13ம் தேதி காலை துவங்கி தொடர்ந்து, 13 நாட்கள் நடைபெறும். இவ்விழாவில், ரதோற்சவம், தெப்போற்சவம், வேடர்பரி உற்சவம் என, வகை வகையான உற்சவங்கள் நடைபெற உள்ளன. மேலும், காலையிலும், மாலையிலும் உற்சவர் கந்தசாமி பெருமான் வள்ளி, தெய்வானையுடன் சிறப்பு அலங்காரத்தில் தோன்றி வீதியுலாவில் பக்தர்களுக்கு அருள்பாலிப்பார். பின், 24ம் தேதி நடைபெறும் திருக்கல்யாண உற்சவத்துடன் பிரம்மோற்சவம் நிறைவு பெறும்.