பண்ருட்டி : பண்ருட்டி திருவதிகை சரநாராயண பெருமாள் கோவிலில் நேற்று அமாவாசையை முன்னிட்டு மூலவர் பெருமாள் பாண்டுரங்கன் அலங்காரத்தில் பக்தர்களுக்கு அருள்பாலித்தார். பண்ருட்டி திருவதிகை சரநாராயண பெருமாள் கோவிலில் நேற்று 24ம் தேதி கார்த்திகை மாத அமாவாசையை முன்னிட்டு காலை 6 மணிக்கு மூலவர் பெருமாள், தாயார், சயன நரசிம்மர் சுவாமிக்கு சிறப்பு அர்ச்சனை, பூஜைகள் நடந்தது. 6.30 மணிக்கு விஸ்வரூபம், 7.30க்கு நித்யபடி பூஜை, 9 மணிக்கு மூலவர் சரநாராயண பெருமாள் பண்டரிபுரம் பாண்டுரங்கன் அலங்காரத்தில் பக்தர்களுக்கு அருள்பாலித்தார். காலை 9.30 மணிக்கு உற்சவர் பெருமாள் உள்புறப்பாடு நடந்து சரநாராயணபெருமாள் திருக்கண்ணாடி அறையில் பக்தர்களுக்கு காட்சியளித்தார். பகல் 12.30 மணிக்கு உச்சிகாலம், மாலை 4 மணிக்கு நடைதிறப்பும், 6 மணிக்கு நித்யபடி பூஜை, இரவு 9 மணிக்கு ஏகாந்த சேவை நடந்தது.