திருத்தணி : திருத்தணி முருகன் கோவிலில், நவம்பர் மாத உண்டியல் வசூல் 52 லட்சம் ரூபாய் ஆனது. திருத்தணி முருகன் கோவிலுக்கு தினமும் ஆயிரக்கணக்கானோர் சுவாமி தரிசனம் செய்கின்றனர். மேலும், பக்தர்கள் தங்களது வேண்டுதலை நிறைவேற்ற ரொக்கம், தங்கம் மற்றும் வெள்ளிப் பொருட்களை உண்டியலில் காணிக்கையாக செலுத்துகின்றனர். ஒவ்வொரு மாதமும் இறுதி நாளில் உண்டியல் திறக்கப்பட்டு ஊழியர்களால் எண்ணப்படுகிறது. சென்ற மாதம் (நவம்பர்) பக்தர்கள் உண்டியலில் செலுத்திய காணிக்கையை எண்ணும் பணி,நேற்று மலைக்கோவில் வளாகத்தில் உள்ள வசந்த மண்டபத்தில் நடைபெற்றது. கோவில் இணை ஆணையர் தனபாலன், மாங்காடு கோவில் துணை ஆணையர் இளம்பரிதி, கோவில் கண்காணிப்பாளர் கலையரசி ஆகியோர் முன்னிலையில் கோவில் ஊழியர்கள் மற்றும் பக்தர்கள், உண்டியல் எண்ணும் பணியில் ஈடுபட்டனர். இதில், 52 லட்சத்து 54 ஆயிரத்து 937 ரூபாய் ரொக்கம், 625 கிராம் தங்கம், வெள்ளி மூன்றரை கிலோ, பித்தளை பொருட்கள் நாலரை கிலோ, வெள்ளித்தகடு, 14 கிலோ ஆகியவை இருந்தன.