திருவள்ளூர் : மூங்காத்தம்மன் மற்றும் விநாயகர், வள்ளி தெய்வானை உடனுறை சுப்பிரமணியர் கோவில் கும்பாபிஷேகம் நேற்று கோலாகலமாக நடந்தது. திருவள்ளூர், பெரியகுப்பம் மூங்காத்தம்மன் கோவில் புனரமைக்கப்பட்டு, புதிதாக மூலவர் கோபுரம், நாக தேவதை, நவகிரகங்கள் அமைக்கப்பட்டது. இதையொட்டி, உற்சவ மூர்த்திகளுக்கு நேற்று கும்பாபிஷேகம் நடந்தது. கும்பாபிஷேகத்தை முன்னிட்டு, 29ம் தேதி காலை கணபதி ஹோமம், நவகிரக ஹோமம் நடந்தது. நேற்றுமுன்தினம் யாக பூஜைகள் நடந்தன. நேற்று காலை 9.30 மணிக்கு கலசங்கள் ஊர்வலமாகக் கொண்டு செல்லப்பட்டது. 10 மணிக்கு கோபுரத்திற்கும், 10.15 மணிக்கு விநாயகர் மற்றும் பரிவாரங்களுக்கும், 10.30 மணிக்கு மூலவர் அம்மனுக்கும், 10.45 மணிக்கு நவகிரகங்களுக்கும் கும்பாபிஷேகம் நடந்தது. தொடர்ந்து மகா தீபாராதனையும், அன்னதானமும் நடந்தது. இரவு 7 மணிக்கு, உற்சவர் மூங்காத்தம்மன், வண்ண மலர்கள் மற்றும் மின் விளக்குகளால் அலங்கரிக்கப்பட்டு திருவீதியுலா வந்து, பக்தர்களுக்கு அருள்பாலித்தார். இவ்விழாவில் சுற்றுச்சூழல்துறை அமைச்சர் ரமணா உட்பட திரளான பக்தர்கள் கலந்து கொண்டனர்.