இவ்வாண்டு கருட சேவை உத்ஸவம் நேற்று முன்தினம் இரவு நடைபெற்றது. கருட சேவையை முன்னிட்டு திருநகரி ஸ்ரீ கல்யாண ரெங்கநாதர் கோயிலில் இருந்து திருமங்கை ஆழ்வார் புறப்பட்டு 11 திவ்ய தேசங்களுக்கு சென்று கருட சேவை க்கு வருமாறு பெருமாள்களை அழைப்பார்.  அவரது அழைப்பை ஏற்று 11 பெருமாள்களும் தங்களது கோயில்களில் இருந்து புறப்பட்டு மணிமாடக் கோயிலுக்கு நேற்று முன்தினம் மாலை எழுந்தருளினர். அவர்களை திருமங்கையாழ்வார் வரவேற்கும் நிகழ்ச்சி நடைபெற்றது. பின்னர் 11 பெருமாள்களும் கோயில் மண்டபத்தில் எழுந்தருள சிறப்பு திருமஞ்சணம் நடை பெற்றது. இரவு 12:30 மணிக்கு மணிமாட கோயில் ராஜகோபுர வாயிலில் மணவாள மாமுணிகளும், ஹம்ஸ வாகனத்தில் குமுதவள்ளி தாயாருடன் திருமங்கை ஆழ்வாரும் எழுந்தருளினர். தொடர்ந்து அங்கு 11 பெருமாள்களும் ஒருவர் பின் ஒருவராக தங்க கருட வாகனத்தில் எழுந்தருளினர். அவர்களுக்கு திருமங்கை ஆழ்வார் மங்களாசாசனம் செய்யும் நிகழ்வு நடை பெற்று, கும்ப தீப ஆரத்தி எடுக்கப்பட்டு சிறப்பு மிக்க தங்க கருட சேவை உற்சவம் நடைபெற்றது.

அப்போது அங்கு கூடியிருந்த பக்தர்கள் அனைவரும் திருமங்கை ஆழ்வார் அருளிய பாசுரங்களை பாடினர். தொடர்ந்து இரவு 1:30 மணிக்கு 11 பெருமாள்களும் தங்க கருட வாகனத்தில் வீதியுலா காட்சி நடைபெற்றது. இதில் நாகை கலெக்டர் சுரேஷ்குமார், எஸ்.பி. வி ஜயக்குமார் உள்ளிட்ட தமிழகம் மட்டுமன்றி வெளி மாநிலங்கள், வெளி நாடுகளில் இருந்து வந்திருந்த பல்லாயிரக்கணக்கான பக்தர்கள் 11 பெருமாளையும் ஒரே இடத்தில் கண்டு சே வித்தனர். தொடர்ந்து 11 பெருமாள்களும் நான்கு மாடவீதிகளையும் வலம்வந்து அதிகாலை மீண்டும் மணிமாடக்கோயிலில் எழுந்தருளினர். உத்ஸவத்தை முன்னிட்டு சீர்காழி டிஎஸ்பி. சாமிநாதன் தலைமையில் போலிசார் பாதுகாப்பு பணியில் ஈடுபட்டிருந்தனர். மயிலாடுதுறை, சீர்காழியில் இருந்து சிறப்பு பஸ்கள் இயக்கப்பட்டன.