2009 கும்பாபிஷேகம் — அன்றும் இன்றும்

2009 ஏப்ரலில் நடைபெற்ற கடைசி கும்பாபிஷேகத்தை தினமலர் நிழற்படக் கலைஞர்கள் பதிவு செய்தனர். அன்றைய காட்சிகளையும் இன்றைய காட்சிகளையும் அருகருகே வைத்துப் பாருங்கள்.

தினமலர் காப்பகம் · 2009 ஏப்ரல் 9 · பக்கம் 1

வேதங்கள் ஒலிக்க, மீனாட்சி கோயிலில் கும்பாபிஷேகம்

அனைத்து தரப்பு மக்களாலும் எதிர்பார்க்கப்பட்ட மதுரை மீனாட்சி அம்மன் கோயிலின் கும்பாபிஷேகம் நேற்று கோலாகலமாக நடந்தது. ரூ. 4 கோடி மதிப்பில் 30 கிலோ எடையுள்ள தங்கத்தால் புதுப்பிக்கப்பட்ட அம்மன் தங்க விமானத்தில் மூத்த சிவாச்சாரியார்கள் ஒன்று கூடி காலை 9.17 மணிக்கு புனித நீரால் அபிஷேகம் செய்தனர். தினமலர், 2009 ஏப்ரல் 9, பக்கம் 1

மதுரை, ஏப். 9 —

மதுரை மீனாட்சி அம்மன் கோயில் கும்பாபிஷேகம் நேற்று வேதங்கள் ஒலிக்க, திருமுறைகள் ஒலிக்க கோலாகலமாக நடந்தது.

இக்கோயில் திருப்பணிகள் 2 ஆண்டுகளுக்கு முன்பு 6 கோடி ரூபாயில் துவங்கியது. தற்போது 320 உபயதாரர்கள் மூலம் 14 கோடி ரூபாய்க்கு திருப்பணிகள் செய்யப்பட்டுள்ளன. பக்தர்கள் காணிக்கையாக செலுத்திய 30 கிலோ தங்கத்தில் அம்மன் சன்னதி கோபுரத்திற்கு தங்க கவசம் செய்யப்பட்டது. இதன் மதிப்பு 4 கோடி ரூபாய்.

கும்பாபிஷேக பூஜைகள் கடந்த மாதம் 26ம் தேதி விக்னேஸ்வர பூஜையுடன் துவங்கியது. ஏப். 2ல் யாகசாலை பூஜைகள் துவங்கின. கோயில் முழுவதும் உள்ள சன்னதிகளுக்கு ஒரே நேரத்தில் கும்பாபிஷேகம் நடத்துவது சிரமம் என்பதால், ஏப். 6ல் அம்மன், சுவாமி சன்னதிகளை சுற்றியுள்ள பரிவார மூர்த்தி சன்னதிகளுக்கு கும்பாபிஷேகம் நடந்தது.

இதைத் தொடர்ந்து நேற்று அதிகாலை 3.30 மணிக்கு இரண்டாம் கால யாக பூஜை நடந்தது. 5 மணிக்கு ஐந்து ராஜகோபுரங்கள் உட்பட 14 கோபுரங்களுக்கு கும்பநீரை சிவாச்சாரியார்கள் எடுத்துச் சென்றனர். அம்மன், சுவாமி தங்க விமானத்தில் காலை 8 மணிக்கு கும்பநீர் கொண்டு வரப்பட்டு கும்பாபிஷேக பூஜைகள் நடந்தன.

காலை 9.17 மணிக்கு அறங்காவலர் குழுத் தலைவர் கருமுத்து கண்ணன் பச்சைக்கொடி காட்ட, ஓம் நமசிவாயா என்று பக்தர்கள் முழங்க, ஒரே நேரத்தில் தங்க கோபுரங்கள் உட்பட அனைத்து கோபுரங்களுக்கும் மகா கும்பாபிஷேகம் நடந்தது.

நீர் தெளிப்பான் இயந்திரங்கள் மூலம் புனித நீர் தெளிக்கப்பட்டது. மூலஸ்தானத்தில் சிறப்பு பூஜைகள் செய்யப்பட்டன. கும்பாபிஷேகத்தைத் தொடர்ந்து நேற்றிரவு 7 மணிக்கு அம்மன், சுவாமி மூர்த்திகள் புறப்பாடாகி நான்கு மாசி வீதிகளில் வலம் வந்தனர். இன்று மண்டலாபிஷேகம் துவங்குகிறது.

விளம்பரம்

2009-ல் எண்களில்

கும்பாபிஷேக நாள்: 2009 ஏப்ரல் 8
மகா கும்பாபிஷேக நேரம்: காலை 9.17
திருப்பணி தொடக்க மதிப்பீடு: ரூ. 6 கோடி
இறுதி செலவு: ரூ. 14 கோடி
உபயதாரர்கள்: 320 பேர்
பக்தர்கள் அளித்த தங்கம்: 30 கிலோ, ரூ. 4 கோடி மதிப்பு
கும்பாபிஷேகம் கண்ட கோபுரங்கள்: 14 கோபுரங்கள்

2009 ஏப்ரல் 8 — அந்த நாள்

03.30 இரண்டாம் கால யாக பூஜை.
05.00 ஐந்து ராஜகோபுரங்கள் உட்பட 14 கோபுரங்களுக்கும் சிவாச்சாரியார்கள் கும்பநீரை எடுத்துச் சென்றனர்.
08.00 அம்மன், சுவாமி தங்க விமானங்களுக்கு கும்பநீர் கொண்டு வரப்பட்டது. இதே நேரத்தில் ராஜகோபுரங்களை கருடன் வட்டமிட்டது.
09.17 அறங்காவலர் குழுத் தலைவர் கருமுத்து கண்ணன் பச்சைக்கொடி காட்ட, அனைத்து கோபுரங்களுக்கும் ஒரே நேரத்தில் மகா கும்பாபிஷேகம்.
19.00 அம்மன், சுவாமி மூர்த்திகள் புறப்பாடாகி நான்கு மாசி வீதிகளில் வலம் வந்தனர்.

விளம்பரம்

கும்பாபிஷேக துளிகள்

அன்றைய தினமலர் பதிப்பில் செய்திக்கு அருகே வெளியான குறிப்புகள்.

கோயிலுக்கு வருபவர்கள் மொபைல் போன்களை பயன்படுத்தக் கூடாது என்று போலீஸ் கமிஷனர் நந்தபாலன் உத்தரவிட்டிருந்தார். அதைக் கண்டுகொள்ளாத போலீசாரும், பக்தர்களும் கோயில் மேல்தளத்தில் மொபைல் போனில் பேசிக் கொண்டிருந்தனர்.
போலீஸ், அரசு அதிகாரிகள் செல்வாக்கை பயன்படுத்தி பாஸ் இல்லாமல் தங்களுக்கு வேண்டியவர்களை மேல்தளத்திற்கு அழைத்து வந்தனர். கோயில் நிர்வாகம் சிறப்பான ஏற்பாடுகளை செய்திருந்தாலும், அதிகாரிகளால் இது போல் சில சங்கடங்கள் ஏற்பட்டன.
ஊர்காவல் படையினரை முக்கிய இடங்களில் பணி அமர்த்தியிருந்ததால், அம்மன் சன்னதி, கிழக்கு சித்திரை வீதிகளில் பக்தர்களை கட்டுப்படுத்த முடியாமல் அவதிப்பட்டனர்.
கோயிலுக்கு செல்ல பாஸ் வைத்திருந்த பக்தர்கள் ஆவணி மூல வீதிகள் வரை ஒரு கிலோ மீட்டர் தூரம் வரிசையில் காத்திருந்தனர்.
நுழைவு வாயில்களில் மெட்டல் டிடெக்டர் டோர் பிரேம்கள் ஒன்று மட்டுமே வைக்கப்பட்டிருந்ததால், பக்தர்களை சோதித்து அனுப்புவதில் தாமதம் ஏற்பட்டது.
அம்மன் சன்னதி நுழைவாயிலில் பாஸ் வைத்திருந்தவர்களை சில போலீசார் கிழக்கு கோபுரம் வழியாக செல்லும்படி கூறியதால், அவர்கள் உரிய இடத்திற்கு விரைவில் செல்ல முடியாமல் நீண்ட நேரம் கியூவில் நின்று அவதிப்பட்டனர்.
காலை 8 மணி முதல் ராஜகோபுரங்களை கருடன் வட்டமடிக்க ஆரம்பித்தது. நான்கு சித்திரை வீதிகளும் வாழைமரங்களால் அலங்கரிக்கப்பட்டிருந்தன.
புனிதநீர் தெளிக்கும்படி பட்டர்களை பக்தர்கள் கேட்டுக் கொண்டனர். கிழக்கு ராஜகோபுரத்தில் இருந்து பட்டர்கள் நீர் தெளித்த போதும் பக்தர்கள் மீது படவில்லை. இதனால் மற்ற கோபுரங்களை நோக்கி ஓடினர்.
பாஸ் இல்லாத பக்தர்கள் காலை 10.30 மணிக்கு மேல் மேற்கு கோபுரம் வழியாக கோயிலுக்குள் அனுமதிக்கப்பட்டனர்.
கோயிலைச் சுற்றி உள்ள 8 வங்கிகளுக்கு மதியம் வரை விடுப்பு அளிக்கப்பட்டது. சென்ட்ரல் மார்க்கெட், மாசி, ஆவணி மூல வீதிகளில் கடைகளுக்கும் விடுமுறை அளிக்கப்பட்டிருந்தது.
காலை 8.45 மணிக்கு பின்னர் கோயில் மேல்தளத்திற்கு செல்ல யாரும் அனுமதிக்கப்படவில்லை. அவர்கள் ஆடி வீதிகளில் அமர்ந்து கும்பாபிஷேகத்தை காண அனுமதிக்கப்பட்டனர்.
அனுமதிச்சீட்டு பெற்ற பல ஆயிரம் பேர் மேல்தளத்திற்கு செல்ல காலை 6 மணிக்கு முன்னதாகவே வந்து நீண்ட கியூவில் நின்றனர். இந்த வரிசை காலை 8.30 மணி வரை நீடித்தது.
பூஜைகள் குறித்த அறிவிப்பும், போலீசாரின் எச்சரிக்கை அறிவிப்பும் கோயிலைச் சுற்றிலும் மைக்கில் தொடர்ந்து ஒலித்துக் கொண்டே இருந்தது.
காலை 9.30 மணிக்கு பின்னர் மொத்த கூட்டமும் கோயிலில் இருந்து வெளியேற முயற்சித்தது. அதே நேரம் ஆவணி மூல வீதிகள், மாசி வீதிகளில் இருந்த கூட்டம் கோயிலுக்குள் வர முண்டியடித்தது. இதனால் கடும் நெருக்கடி ஏற்பட்டது.
போலீசார் அன்னதானத்திற்கு தடை விதித்திருந்தாலும், கோயில் பகுதிகளில் உணவுப் பொட்டலங்கள், குளிர்பானங்கள், நீர், மோர் வழங்கியதால் நெரிசல் ஏற்பட்டது.
சில நாட்களாக மதுரையில் வெயில் கொளுத்தியது. ஆனால் அன்று காலை முதலே வெயிலின் தாக்கம் இல்லாமல் மேகமூட்டமாக இருந்தது.