வடபழநி : வடபழநி ஆண்டவர் கோவில் கும்பாபிஷேகத்திற்கான திருப்பணிகள் மேற்கொள்ளும் வகையில், பாலாலயப் பிரதிஷ்டை, துவங்கியது.

பாலஸ்தாபன நாளான, இன்று அதிகாலை, 5:50 மணிக்கு இரண்டாம் கால யாகசாலை பூஜைகள் துவங்கியது. தொடர்ந்து, காலை, 8:00 மணிக்கு மகா பூர்ணாஹுதியும், காலை 8:30 மணிக்கு, பாலாலய பிரதிஷ்டை நடைபெற்று, காலை, 9:15 மணிக்கு திருப்பணிகள் துவங்கியது. பாலாலய பிரதிஷ்டையை பக்தர்கள் பார்வையிடுவதற்காக, சிறப்பு ஏற்பாடுகள் செய்யப் பட்டு உள்ளன. பின், பக்தர்களுக்கு அன்னதானம் வழங்கப்படுகிறது.

சென்னை, வடபழநி ஆண்டவர் கோவில், 1890ம் ஆண்டு எளிய ஓலைகூரைக் கொட்டகையில் நிர்மாணிக்கப்பட்டது.பல்வேறு காலக்கட்டங்களில் வளர்ச்சி பெற்ற இக்கோவிலில், கும்பாபிஷேகம் நடக்க முடிவு செய்யப்பட்டு, திருப்பணிகள் துவங்க உள்ளன. இதற்கான பாலஸ்தாபன விழா இன்று நடக்கிறது. இதை முன்னிட்டு, நேற்று காலை, 9:00 மணி முதல் அனுக்ஞை, விக்னஷே்வர பூஜை, பிரதிஷ்டா சங்கல்பம், கணபதி ஹோமம், நவக்கிரஹ ஹோமம் நடந்தது. மாலை, 5:00 மணிக்கு வாஸ்து சாந்தி பூர்வாங்க பூஜைகள் ஆரம்பமாகின. மாலை, 6:00 மணிக்கு கலா கர்ஷணம் முதற்கால யாகசாலை பூஜைகள் துவங்கின. இரவு, 9:30 மணிக்கு மகா பூர்ணாஹுதி, தீபாராதனை நடந்தது. இந்நிகழ்ச்சியில், வருவாய்த் துறை அமைச்சர் உதயகுமார் உள்ளிட்ட ஏராளமான பக்தர்கள் பங்கேற்றனர். இதற்கான ஏற்பாடுகளை, கோவில் தக்கார் எல்.ஆதிமூலம், கோவில் துணை கமிஷனர் சித்ராதேவி ஆகியோர் செய்துள்ளனர்.