திருவாடானை :கோயில்களில் பக்தர்களுக்கு விபூதி வழங்கும் போது கையில் கொடுக்காமல் தாம்பூழ தட்டில் வைக்க சிவாச்சாரியார்களுக்கு ஹிந்து அறநிலையத் துறை உத்தரவிட்டுள்ளது.

திருவாடானை அருகே திருவெற்றியூரில் பிரசித்தி பெற்ற பாகம்பிரியாள் கோயில் உள்ளது. ஆடி மற்றும் சித்திரை மாத திருவிழாக்களில் திரளான பக்தர்கள் கூடுவார்கள். கொரோனா அச்சத்தால் கோயிலில் நேற்று பக்தர்கள் கூட்டம் குறைவாக இருந்தது. கோயில் உள்பிரகாரத்தில் நோய் தடுப்பு கிருமிநாசினி தெளிக்கப்பட்டது. ஹிந்து அறநிலையதுறை உத்தரவால் கோயிலில் பக்தர்கள் கையில் விபூதி கொடுக்கப்படவில்லை.சிவாச்சாரியார்கள் கூறுகையில், ஹிந்து அறநிலையத்துறை சார்பில் கொரோனா விழிப்புணர்வு கூட்டம் நடந்தது. பக்தர்களுக்கு கையில் விபூதி கொடுக்காமல் தாம்பூழ தட்டில் வைக்க வேண்டும் என அறிவுறுத்தப்பட்டுள்ளது என்றனர்.