பரமக்குடி: பரமக்குடி சுந்தரராஜப் பெருமாள் கோயிலின் சித்திரைத் திருவிழாவில், குதிரை வாகனத்தில் எழுந்தருளி, நேற்று முன் தினம் மாலை காக்காத்தோப்பு பெருமாள் கோயிலில் இருந்து சேஷ வாகனத்தில் புறப்பட்டார். மட்டா மண்டகப்படியில் மண்டூக மகரிஷிக்கு, துர்வாச முனிவரால் ஏற்பட்ட சாபத்தை நீக்கி விமோசனம் அளிக்கும் நிகழ்ச்சி நடந்தது. வாணிய மண்டகப்படிக்கு எழுந்தருளிய பெருமாள் இரவு 1 மணி முதல் அர்ச்ச, மச்ச, கூர்ம, வாமன, பரசுராம, பலராம, ராம, மோகினி அவதாரங்களில் காட்சியளித்தார். விடிய விடிய பக்தர்கள் பெருமாளை தரிசித்து பரவசமடைந்தனர். மழை பெய்ததால் "அக்னி அனல் அடங்கி பரமக்குடி குளிர்ந்தது. நேற்றிரவு கருடவாகனத்தில் எழுந்தருளிய பெருமாள், மட்டா மண்டகப்படியை அடைந்தார். இன்று கிரி மண்டகப்படியில் ராஜாங்க திருக்கோலமும், நாளை காலை 7 மணிக்கு பெருமாள், கள்ளழகர் திருக்கோலத்துடன் புஷ்பப்பல்லக்கில் நகர் வலம் வந்து மாலை 6 மணிக்கு கோயிலை வந்தடைகிறார். இரவில் கண்ணாடி சேவை நிகழ்ச்சி நடக்கிறது. ஏற்பாடுகளை சுந்தரராஜப் பெருமாள் தேவஸ்தான டிரஸ்டிகள் செய்து வருகின்றனர்.