மதுரை: மதுரை மீனாட்சி அம்மன் திருக்கல்யாணம் குறித்து சமூகவலைத்தளத்தில் அவதுாறு பரப்பிய 6 பேர் மீது போலீசார் வழக்குப்பதிவு செய்தனர்.

ஊரடங்கால் மதுரை சித்திரை திருவிழா ரத்தான நிலையில், மீனாட்சி திருக்கல்யாணம் மட்டும் மே 4ல் நடந்தது. அம்மன் குறித்து தவறாகவும், ஆபாசமாகவும் அரவிந்தன் ரஜினி, சிவசிவா, மனோகரன், செல்வேந்திரன், ஆன்டோ லியோனி சைக்கிள் பிரான்ட், கலீம் முகமது ஆகியோரது பெயர்களை கொண்ட முகநுாலில் பதிவிடப்பட்டிருந்தது. இது தொடர்பாக திண்டுக்கல், கோவையில் போலீசில் புகார் செய்யப்பட்டது. மதுரை போலீசிற்கும் தமிழகம் முழுவதும் இருந்தும் ஆன்லைனில் புகார்கள் தொடர்ந்து அனுப்பப்பட்டன. இதைதொடர்ந்து சம்பந்தப்பட்ட நபர்கள் மீது மத நம்பிக்கைளை புண்படுத்தும் செய்கைகளை செய்தது, ஒரு சமூகத்திற்கு எதிரான கருத்துகளை வெளியிட்டது ஆகிய பிரிவுகளின் கீழ் மீனாட்சி அம்மன் கோயில் போலீசார் வழக்குப்பதிவு செய்தனர்.