கந்த சஷ்டி விவகாரத்தில், துரிதமாக நடவடிக்கை எடுத்த, தமிழக அரசுக்கு பாராட்டு தெரிவித்துள்ள ரஜினி, மதத் துவேஷமும், கடவுள் நிந்தனையும் ஒழிய வேண்டும் எனக் கூறியுள்ளார்.கந்த சஷ்டி கவசத்தை இழிவாக சித்தரித்த, கருப்பர் கூட்டம் என்ற குழுவினரை கைது செய்ததோடு, அவர்களின் வீடியோக்களும், சமீபத்தில் அழிக்கப்பட்டன. இது குறித்து, நடிகர் ரஜினி, டுவிட்டரில் தமிழக அரசுக்கு பாராட்டு தெரிவித்துள்ளார்.

அவர் பதிவிட்டுள்ளதாவது:கந்த சஷ்டி கவசத்தை மிகக் கேவலமாக அவதுாறு செய்து, பல கோடி தமிழ் மக்களின் மனதைப் புண்படுத்தி கொந்தளிக்க செய்துள்ளனர். இதுபோன்ற ஈனச்செயலை, வாழ்க்கையில் மறக்க முடியாதபடி செய்தவர்கள் மீது, துரிதமாக நடவடிக்கை எடுத்து, சம்பந்தப்பட்ட வீடியோக்களை, அரசு தலையிட்டு நீக்கியதற்காக, தமிழக அரசுக்கு, என் மனமார்ந்த பாராட்டுகள். இனிமேலாவது மதத் துவேஷமும், கடவுள் நிந்தனையும் ஒழியட்டும்; ஒழிய வேண்டும். எல்லா மதமும் சம்மதமே. கந்தனுக்கு அரோகரா!இவ்வாறு, அவர் கூறியுள்ளார். ஆனால், விஷயம் ஐந்து நாட்களாக பற்றி எரியும் நிலையில், மிக நிதானமாக நேற்று தான் இவர் அறிக்கை வெளியிட்டுள்ளார். இதற்கான காரணம் என்னவென்று விளங்கவில்லை.