உத்திரம் 2, 3 4ம் பாதம் :  ராசிநாதன் புதன் மற்றும் நட்சத்திர அதிபதி சூரியன் ஆகியோரின் இணைவு நன்மையைத் தரும் வகையில் அமைந்துள்ளது. நான்காம் இடம் ஆகிய சுக ஸ்தானம் வலுப்பெறுவதால் வாழ்வியல் நிலை உயர்வடையும். குரு பகவானின் ஐந்தாம் இடத்து அமர்வு நிலை உங்களை மிகுந்த ஈடுபாட்டோடு பணியாற்ற வைக்கும். பொறுப்புகளைச் சுமப்பதில் முழு ஆர்வம் கொள்வீர்கள். இதனால் கடுமையான பணிகளையும் எளிதாகச் செய்து முடிப்பீர்கள். குடும்பத்தில் மகிழ்ச்சி நிலவும். நடப்பதெல்லாம் நன்மைக்கே என்ற எண்ணம் கொண்டிருப்பதால் பலனை எதிர்பாராமல் கடமையைச் செய்வீர்கள். உறவினர் ஒருவர் நீங்கள் எப்போதோ செய்த உதவியை நினைவில் கொண்டு தற்போது நன்றிக்கடன் செலுத்துவார். அடுத்த வீட்டுக்காரர்களுக்கு உதவப்போய் அதிக அலைச்சலுக்கு ஆளாவீர்கள். உறவினர்களின் சந்திப்பு உற்சாகத்தைத் தரும். பிள்ளைகளின் விவேகம் நிறைந்த செயல்களைக் கண்டு பெருமிதம் கொள்வீர்கள். வளர்ப்புப் பிராணிகளிடம் எச்சரிக்கையோடு பழகுவது நல்லது. மனதில் தோன்றுவதை உடனுக்குடன் செயல்படுத்துவதில் வெற்றி காண்பீர்கள். வாழ்க்கைத்துணையின் ஆலோசனைகள் உரிய நேரத்தில் பயன்தரும். வயிற்றுவலி சார்ந்த உபாதைகளால் அவதியுற நேரலாம். பணிக்குச் செல்வோர் சுறுசுறுப்பான பணிகளின் மூலம் தனிமதிப்பைப் பெறுவர். சுயதொழில் செய்வோருக்கு வெளிவட்டாரத் தொடர்புகள் அதிகரிக்கும்.  மாணவர்கள் பாடங்களில் முழு ஈடுபாடு கொள்வர். இரவினில் கனவுத்தொல்லையால் நிம்மதியான உறக்கம் கெடலாம். தன்னம்பிக்கை உயரும் மாதம் இது.

ஹஸ்தம் :  இந்த மாத கிரக நிலை சாதகமாக இருப்பதால் பொருளாதார ரீதியாக நல்லதொரு நிலையினைக் கண்டு வருவீர்கள். ஆயினும் அஷ்டம ஸ்தானத்தில் ஆட்சி பெறும் செவ்வாயால் செலவுகளும் தொடர்ந்து இருந்து வரும். பொருள் விரயமாகாமல் தடுக்க சேமிப்பில் ஈடுபட்டாலும் ஓரளவிற்கே வெற்றி காண முடியும். அல்லல்பட்டு வருவோர்க்கு உங்களுடைய ஆறுதலான வார்த்தைகள் தெம்பூட்டும். ருசியான உணவு வகைகளை மிகவும் விரும்பி உண்பீர்கள். அடுத்தவர்களின் வேலையை இழுத்துப் போட்டுக்கொண்டு செய்வீர்கள். உடன்பிறந்தோருக்காக நீங்கள் அலைய வேண்டி வரும். தகவல் தொடர்பு சாதனங்கள் மிகுந்த நன்மையைத் தரும். தாயார் வழி உறவினர்களின் வருகை மனதிற்கு மகிழ்ச்சியைத் தரும். அவர்களால் குறிப்பிடத்தகுந்த ஆதாயமும் உண்டு. மாணவர்கள் கணிதம், அறிவியல் பாடங்களில் சிறப்பான முன்னேற்றம் காண்பார்கள். பிள்ளைகளின் வழியில் சுப செலவுகளை சந்திக்க நேரிடும். அவர்களது வாழ்வினில் சுபநிகழ்ச்சிகள் நடப்பதற்கான ஏற்பாடுகளை செய்ய நேரிடும். உடல்நிலையில் தொடர்ந்து கவனம் செலுத்தி வருவது நல்லது. வாழ்க்கைத்துணை உங்களுக்கு பக்கபலமாக இருப்பதோடு மட்டுமல்லாமல் உங்களுடைய நலனுக்காக மிகவும் சிரத்தை எடுத்துக்கொண்டு செயல்படுவார். முன்பின் தெரியாத பெண்களிடம் எச்சரிக்கையுடன் இருப்பது நலம் தரும். வியாபாரிகளுக்கு தொழில் நல்ல நிலைமையில் இருக்கும். உத்யோகஸ்தர்கள் அலுவலகத்தில் ஊதிய உயர்வினைக் காணும் நேரம் இது. கலைத்துறையினர் தொழில் முறையில் நினைத்த காரியங்களை எளிதாக சாதித்து எதிர்காலத்தை வளமாக்கிக்கொள்ள முயற்சிப்பார்கள். சிறப்பான பலன்களைத் தரும் மாதம் இது.

பரிகாரம் : ராதாகிருஷ்ணர் வழிபாடு நன்மை தரும்.