ஈரோடு: ஈரோட்டில் உள்ள ஆருத்ர கபாலீஸ்வரர் கோவில், மகிமாலீஸ்வரர் கோவில், வெண்டிபாளையம் பச்சையம்மன் கோவில், கருங்கல்பாளையம் ஐயப்பன் கோவில், சீரடி சாய்பாபா கோவில், காவிரிக்கரை சோழீஸ்வரர் கோவில் உள்ளிட்ட, மாநகரில் உள்ள சிவாலயங்களில், மகா சிவராத்திரி சிறப்பு வழிபாடு நேற்றிரவு முழுவதும் நடந்தது. இதையொட்டி கோட்டை ஆருத்ர கபாலீஸ்வரர் கோவில், நான்கு கால யாக வேள்வி பூஜை நடந்தது. இதில் முதல் கால பூஜையில், 108 கலசங்கள், இரண்டாம் கால பூஜையில், 11 கலசங்கள், மூன்றாம் கால பூஜையில், 51 கலசங்கள், நான்காம் கால பூஜையில், 25 கலசங்கள் வைக்கப்பட்டு பூஜை நடந்தது. ஒவ்வொரு பூஜைக்கு பின்பும், பூஜிக்கப்பட்ட கலச நீரால் மூலவருக்கு அபிஷேகம் செய்யப்பட்டு, தாழம்பூவால் அலங்கரிக்கப்பட்டது. இதேபோல் கருங்கல்பாளையம் சீரடி சாய்பாபா கோவில் உள்பட, மாநகரில் உள்ள பல்வேறு கோவில்களில், மஹா சிவராத்திரி வழிபாடு, அறம் சார்ந்த நிகழ்ச்சிகள் நடந்தன. சிவனடியார்கள், பக்தர்கள் திரளாக கலந்து கொண்டனர்.