மேட்டுப்பாளையம்: காரமடை அரங்கநாதர் கோவிலில், பொதுமக்களுக்கு இலவசமாக கபசுர குடிநீர் வழங்கப்படுகிறது. தமிழக இந்து சமய அறநிலைத்துறை அறிவிப்பின் பேரில், அன்னதான திட்ட கோவில்களில் இருந்து, மருத்துவமனைகளுக்கும், கொரோனா சிகிச்சை மையங்களுக்கு, உணவு பொட்டலங்களை வழங்கும்படி உத்தரவிட்டது. இதை அடுத்து அரசு மருத்துவமனை, கொரோனா சிகிச்சை மையங்களுக்கும், அன்னதான திட்ட கோவில்கள் சார்பில், உணவு பொட்டலங்கள் வழங்கப்பட்டு வருகின்றன. இந்நிலையில் மக்களுக்கு, கபசுர குடிநீரும் வழங்கும்படி, இந்து சமய அறநிலை துறை அறிவித்துள்ளது. இதையடுத்து காரமடை அரங்கநாதர் கோவில் நிர்வாகம், காரமடை அரசு மருத்துவமனைக்கும், தனியார் பள்ளியில் உள்ள கொரோனா சிகிச்சை மையத்திற்கும், உணவு பொட்டலங்களை வழங்கி வருகிறது. நேற்று கோவில் முன்பாக கபசுர குடிநீர் வழங்கும் நிகழ்ச்சியை தொடங்கி, பொதுமக்களுக்கு கபசுரக் குடிநீர் வழங்கப்படுகிறது.