சென்னை: விநாயகர் சதுர்த்தி விழாவின் போது, சிங்கப்பூர் சிவன் கோவிலில் வைக்கப்பட்டிருந்த, 100 சதவீதம் வெட்டி வேரால் செய்யப்பட்ட விநாயகர் சிலை , அந்நாட்டில் வசிக்கும் தமிழக பக்தர்களை வெகுவாக கவர்ந்தது. விநாயகர் சதுர்த்தி விழா கடந்த மாதம் கோலாகலமாக கொண்டாடப்பட்டது. நம் நாட்டில் மட்டுமின்றி, உலகின் பல்வேறு நாடுகளிலும் உள்ள ஹிந்துக்கள், தங்கள் வீடுகளில் சிறிய அளவிலான விநாயகர் சிலைகளை நிறுவிவழிபட்டனர். அதே போல், வெளி மாநிலங்கள் மற்றும் வெளிநாடுகளில், சில இடங்களில் பிரமாண்ட விநாயகர் சிலைகள் நிறுவப்பட்டு வழிபாடு நடத்தப்பட்டது. அந்த வகையில், சிங்கப்பூர் நாட்டில் உள்ள சிவன் கோவிலில், 100 சதவீதம் வெட்டி வேரால் செய்யப்பட்ட விநாயகர் சிலை நிறுவப்பட்டு, சிறப்பு வழிபாடுகள் நடந்தன. அந்நாட்டில் வசிக்கும், தமிழகத்தச்சேர்ந்தோர் பலரும், வெட்டி வேர் விநாயகரை வழிபட்டனர்.