சென்னை: தீபாவளி பண்டிகை இன்று நவ., 04ம் தேதி நாடு முழுவதும் வழக்கமான உற்சாகத்துடன் கொண்டாடப்பட்டு வருகிறது. இந்துக்களின் புனித பண்டிகையான தீபாவளி ஒவ்வொரு ஆண்டும் ஐப்பசி மாதம் அமாவாசை திதியில் கொண்டாடப்படுகிறது. தீபங்களின் வரிசை என்று தமிழில் பொருள்படும் இந்நன்நாளில் மக்கள் அதிகாலை கங்கா ஸ்நானம் செய்து, புத்தாடை உடுத்தி, பலகாரங்கள், உணவுப் பொருட்களை இறைவனுக்கு படைத்து வணங்குவார்கள்.

காலை மற்றும் மாலை வேளையில் பட்டாசுகளை வெடித்தும், உறவினர்களுக்கும், நண்பர்களுக்கும் இனிப்புகள் வழங்கியும், தீபாவளி வாழ்த்தினை பகிர்ந்தும் இப்பண்டிகையை மகிழ்ச்சியுடன் கொண்டாடுவர். பெரும்பாலான மக்கள் கோவில்களுக்கு சென்று இறைவனை வணங்குவர். நம் நாட்டில் இந்துக்கள் மட்டுமில்லாது, சமண, புத்த மதத்தினரும், சீக்கியர்களும் இப்பண்டிகையை வருடந்தோறும் கொண்டாடி வருகின்றனர். இந்நாளில் பல்வேறு தலைவர்களும் மக்களுக்கு தங்கள் தீபாவளி வாழ்த்துக்களை தெரிவித்துள்ளனர். இந்த ஆண்டின் மார்ச் மாதம் முதல் கோவிட் இரண்டாம் அலை நாட்டின் பெரும்பாலான பகுதிகளில் வேகமாக பரவியது. இருப்பினும் தீமை விலகி நன்மை வந்ததை குறிக்கும் விதமாக தீபாவளி பண்டிகைக்கு ஒரு சில மாதங்களுக்கு முன்பாகவே கோவிட் பரவல் நாடு முழுவதும் கட்டுக்குள் வந்தது. மத்திய மாநில அரசுகளின் நடவடிக்கையால் பெரும்பாலானவர்களுக்கு தடுப்பூசி செலுத்தப்பட்டு இது சாத்தியமானது. இதனால் இந்தாண்டும் பொதுமக்கள் வழக்கமான உற்சாகத்துடன் கடை வீதிகளில் குவிந்தனர். வாசகர்கள் அனைவருக்கும் இனிய தீபாவளி வாழ்த்துக்களை தினமலர்.காம் மகிழ்ச்சியுடன் தெரிவித்துக் கொள்கிறது.