ஓசூர்: தேன்கனிக்கோட்டை அருகே, கனகதாசரின், 534வது ஜெயந்தி விழாவையொட்டி, தலையில் தேங்காய் உடைத்து குரும்பர் இன மக்கள் நேர்த்திக்கடன் செலுத்தினர்.

கிருஷ்ணகிரி மாவட்டம், தேன்கனிக்கோட்டையில் குரும்பர் சங்கர் மற்றும் கனகஜோதி சேவா சமிதி சார்பில் கவியரசர் கனகதாசரின், 534வது ஜெயந்தி விழா நடந்தது. முன்னதாக, அலங்கரிக்கப்பட்ட கனகதாசர் பல்லக்கு மற்றும் குலதெய்வங்கள், குரும்பர் இன மக்களின் பாரம்பரிய கலாசார முறைப்படி டொல்லு, குணிதா, வீரகாசை, வீரபத்ர குணிதா ஆகிய நடனங்களுடன், மேளதாளம் முழங்க முக்கிய வீதிகளில் ஊர்வலமாக கொண்டு செல்லப்பட்டன.  தொடர்ந்து வீரபத்ரசுவாமி, சிக்கம்மா சிவலிங்கேஸ்வரி தேவி, ஸ்ரீதொட்டம்மா ஜெகதீஸ்வரி தேவி, சிக்கவீரம்மா தேவி, லிங்கேஸ்வர சுவாமி உள்ளிட்ட பல்வேறு குல தெய்வங்களை வரிசையாக வைத்து சிறப்பு பூஜை நடந்தது. இதையடுத்து சிறுவர்கள் முதல், பெரியவர்கள் வரை, 100க்கும் மேற்பட்டோர் தலையில் தேங்காய் உடைத்து நேர்த்திக்கடன் செலுத்தினர். விழாவில், தேன்கனிகோட்டை, கெலமங்கலம், தளி, அஞ்செட்டி, ஓசூர் மட்டுமின்றி, கர்நாடகா மாநில பக்தர்கள் ஏராளமானோர் பங்கேற்றனர்.