மேல்மருவத்துார் : ஆதிபராசக்தி சித்தர் பீடத்தில் நடந்த ஆங்கில புத்தாண்டு விழாவில், பங்காரு அடிகளார் நேற்று, பக்தர்களுக்கு நலத்திட்ட உதவிகள் வழங்கினார்.மேல்மருவத்துார் ஆதிபராசக்தி சித்தர் பீடத்தில், ஆண்டுதோறும் ஆங்கில புத்தாண்டு விழா நடைபெறும். இந்தாண்டு ஆங்கில புத்தாண்டையொட்டி, ஆதிபராசக்தி அம்மனுக்கு, நேற்று அதிகாலை 3:00 மணிக்கு, மங்கள இசையுடன் சிறப்பு அபிஷேகம் நடந்தது.

அதன் பின், காலை 5:00 மணிக்கு, உலக நன்மைக்காக கலச விளக்கு பூஜையை, ஆதிபராசக்தி ஆன்மிக இயக்க தலைவர் லட்சுமி பங்காரு அடிகளார் துவக்கி வைத்தார். சித்தர் பீடம் வந்த பங்காரு அடிகளாருக்கு, கர்நாடக மாநில பக்தர்கள் வரவேற்பு அளித்தனர்.தொடர்ந்து, கர்நாடக மாநில, மேல்மருவத்துார் ஆதிபராசக்தி சித்தர் பீடம் சார்பில், பெங்களூரு ஜெயதேவ் மருத்துவமனைக்கு 10 லட்சம் ரூபாய், ஆதிபராசக்தி அன்னை இல்லத்திற்கு 3 லட்சம் ரூபாய், 37 லட்சம் ரூபாய் மதிப்பிலான வாழ்வாதார பொருட்கள் என, 50 லட்சம் ரூபாய் மதிப்பிலான நலத்திட்ட உதவிகளை, பக்தர்களுக்கு பங்காரு அடிகளார் வழங்கினார்.விழாவில், கர்நாடக மாநில பக்தர்கள் உள்ளிட்ட பலர் பங்கேற்றனர். விழா ஏற்பாடுகளை, கர்நாடக மாநில மேல்மருவத்துார் ஆதிபராசக்தி ஆன்மிக இயக்க நிர்வாகிகள் ராஜகோபால், உதயகுமார் மற்றும் பொறுப்பாளர்கள் செய்திருந்தனர்.