பழநி: தமிழக அரசின் கோரோனா கட்டுப்பாட்டு நடைமுறை அறிவிப்பால் பாதயாத்திரை பக்தர்கள் பாதியில் பஸ்ஸில் ஏறி வந்ததால் கூட்டம் பழநியில் அதிகரித்தது.

பழநிக்கு தைப்பூசத்தை முன்னிட்டு பாதயாத்திரையாக பக்தர்கள் வெளி மாவட்ட, மாநிலத்திலிருந்து வந்த வண்ணம் உள்ளனர். இந்நிலையில் ஜன.5ல் தமிழக அரசு கொரோனா பரவல் தடுப்பு முன்னெச்சரிக்கை நடவடிக்கையாக வெள்ளி, சனி, ஞாயிறு ஆகிய கிழமைகளில் வழிபாட்டுத் தலங்களுக்கு பக்தர்கள் அனுமதி இல்லை என அறிவித்தது. இதனைத் தொடர்ந்து பாதயாத்திரையாக நடந்து வந்த பக்தர்கள் பெரும்பாலானோர் பஸ்களில் ஏறி நேற்று பழநியை வந்தடைந்தனர். இதனால் பழநி மலைக்கோயிலில் அதிக அளவில் கூட்டம் நிரம்பியிருந்தது. போதுமான அளவு போலீசார் இல்லாததாலும், கோயில் பாதுகாவலர்கள் குறைவாக இருந்ததாலும் கூட்டத்தை சமாளிக்க முடியாமல் திணறினர். கோயில் பொது தரிசன கட்டண தரிசன வரிசையில் பக்தர்கள் நிரம்பி வழிந்தனர். பக்தர்கள் தடுப்புகளை தாண்டி வரிசைக்குள் சென்றனர். இதனால் பக்தர்கள் இடையே சலசலப்பு ஏற்பட்டது. வின்ச், ரோப் கார் வரிசையிலும் கூட்டம் அதிகளவில் இருந்தது. பொது தரிசனத்தில் பக்தர்கள் நான்கு மணி நேரத்திற்கு மேல் காத்திருந்து தரிசனம் செய்தனர். பஸ் ஸ்டாண்ட் பகுதிகளில் பக்தர்கள் கூட்டம் அதிகளவில் இருந்தது. பஸ்களில் கூட்ட நெரிசல் அதிகமாக இருந்தது. இதனால் பக்தர்கள் சிரமம் அடைந்தனர்.