தர்மபுரி : தீர்த்தமலை தீர்த்தகிரீஸ்வரர்  மாசிமக தேரோட்டம் இன்று விமர்சையாக நடந்தது.

தர்மபுரி மாவட்டம், அரூர் அடுத்த தீர்த்தமலை தீர்த்தகிரீஸ்வரர் கோவில் மாசிமக தேரோட்ட விழா கடந்த, 16ல், விநாயகர் பூஜை, கணபதி ஹோமத்துடன் துவங்கியது. 17ல், கொடியேற்றமும், 21ல், சுவாமி திருக்கல்யாணமும் நடந்தது. விழாவின், முக்கிய நிகழ்வான மாசிமக தேரோட்டம் இன்று, விமர்சையாக நடந்தது. கோவில் முன், அலங்கரிக்கப்பட்டு நிறுத்தி வைக்கப்பட்டிருந்த விநாயகர், தீர்த்தகிரீஸ்வரர், வடிவாம்பிகை ஆகிய, மூன்று தேர்கள் மீது, முத்துக்கொட்டை, பொறி, மிளகு, உப்பு மற்றும் நவதானியங்களை துாவி, பக்தர்கள் தங்களது நேர்த்தி கடனை செலுத்தி வழிபட்டனர். பின், மதியம், 2:15 மணிக்கு, பக்தர்கள் முதலாவதாக அலங்கரிக்கப்பட்ட விநாயகர் தேரை வடம் பிடித்தனர். தொடர்ந்து,  விநாயகர் தேர் நிலையை அடைந்ததும், தீர்த்தகிரீஸ்வரர் தேர் புறப்பாடு நடந்தது.  அதற்கடுத்து, வடிவாம்பிகை தேரை பக்தர்கள் வடம் பிடித்தனர். விழாவில், சேலம், கிருஷ்ணகிரி, திருவண்ணாமலை, வேலுார் உள்ளிட்ட மாவட்டங்களில் இருந்து, 30 ஆயிரத்திற்கும் மேற்பட்ட பக்தர்கள் பங்கேற்றனர். பக்தர்களுக்கு அன்னதானம் மற்றும் நீர்மோர் வழங்கப்பட்டது.  விழாவை முன்னிட்டு, தமிழ்நாடு அரசு போக்குவரத்து கழக அரூர் கிளை சார்பில், சிறப்பு பஸ்கள் இயக்கப்பட்டது. டி.எஸ்.பி., பெனாசிர் பாத்திமா தலைமையில், போலீசார் பாதுகாப்பு பணியில் ஈடுபட்டனர்.