சபரிமலை : சபரிமலையில் ஆன்லைன் முன்பதிவு தரிசனத்துக்கு இருந்த எண்ணிக்கை கட்டுப்பாடு நேற்று முதல் நீக்கப்பட்டது. எவ்வளவு பக்தர்களும் தரிசனத்துக்கு வரலாம் என்று அறிவிக்கப்பட்டுள்ளது. சபரிமலையில் தற்போது பங்குனி உத்திர திருவிழா நடைபெற்று வருகிறது. தினமும் தரிசனத்துக்கு 15 ஆயிரம் பக்தர்களுக்கு ஆன்லைன் முன்பதிவு மூலம் அனுமதி வழங்கப்பட்டிருந்தது. கொரோனா தாக்கம் குறைந்து வரும் நிலையில் கூடுதல் பக்தர்களை அனுமதிக்க தேவசம்போர்டு கேரள அரசுக்கு கோரிக்கை விடுத்திருந்தது. இந்நிலையில் ஆன்லைன் முன்பதிவு கட்டுப்பாட்டை நீக்கும் படி கேரள ஐகோர்ட் உத்தரவிட்டது. இதன் படி நேற்று முதல் கட்டுப்பாடுகள் நீக்கப்பட்டது. எவ்வளவு பக்தர்கள் வேண்டுமானாலும் ஆன்லைனின் முன்பதிவு செய்ய வசதி செய்யப்பட்டுள்ளது. எனினும் இரண்டு தடுப்பூசி சான்றிதழ் அல்லது 72 மணி நேரத்தில் எடுக்கப்பட்ட ஆர்.டி.பி.சி.ஆர். சான்றிதழ் கட்டாயமாக கொண்டு வரவேண்டும்.