உத்தமபாளையம்: உத்தமபாளையம் பகவதி அம்மன் கோவில் திருவிழா நடைபெற்றது. சக்தி கரகம் எடுக்கும் நிகழ்ச்சியிலும், மறுநாள் முல்லை பெரியாற்றில் கலக்கும் நிகழ்ச்சியிலும் ஆயிரக்கணக்கில் பக்தர்கள் பங்கேற்றனர்.

உத்தமபாளையம் வடக்குத் தெருவில் பகவதியம்மன் கோவில் உள்ளது. மிகவும் புராதனமான இந்தக் கோயிலில் சக்தி கரகம் எடுக்கும் நிகழ்ச்சி பிரசித்திபெற்றது. இசையமைப்பாளர் இளையராஜா தனது பாடல் ஒன்றில் " ஊர் மெச்சும் உத்தமபாளையம் கரகம்" என்று பாடியுள்ளார். இந்த கோயில் திருவிழா ஏப். 12 ல் துவங்கியது. ஒவ்வொரு நாளும் ஒவ்வொரு சமூகத்தினர் மண்டகப்படி நடத்தினார்கள். தினமும் எருமைக் கிடா ஒன்றை ஆற்றில் குடிப்பாட்டி ஊர்வலமாக அழைத்து வருவார்கள். பெண்கள் மஞ்சள் நீரை ஊற்றி மாலைகள் அணிவிப்பார்கள். ஏப். 19 ல் முல்லைப்பெரியாற்றில் சக்தி கரகம் எடுத்து கிழக்கு ரதவீதி, மேற்கு ரதவீதி வழியாக கோயில் சென்றடைந்தது. நள்ளிரவில் பெண்கள் மாவிளக்கு எடுத்தனர். முன்னதாக அக்னிசட்டி எடுத்தல், பொங்கல் வைத்தல், உருண்டு கொடுத்தல் போன்ற நேர்த்திகடன்கள் பக்தர்களால் நிறைவேற்றப்பட்டது. நேற்று முன்தினம் இரவு எண்திசையிலும் காவு கொடுத்து, சக்தி கரகம் முல்லைப்பெரியாற்றில் கலக்கப்பட்டது. இந்த திருவிழாவில் ஆயிரக்கணக்கில் பக்தர்கள் கலந்து கொண்டு சக்தி கரகத்தை தரிசித்தனர். இப்பகுதியில் உள்ள பல கோயில்களில் சக்தி கரகம் எடுத்தாலும், இந்த கோயில் சக்திகரகம் விசேசமானது என்றும், வேண்டும் காரியங்கள் நிறைவேறும் என்றும் பக்தர்கள் கூறினார்கள்.