மதுரை: கூடலழகர் பெருமாள் கோயிலில் வைகாசி திருவிழா கொடியேற்றத்துடன் துவங்கியது. ஸ்ரீதேவி, பூதேவியுடன் வியூக சுந்தரராஜ பெருமாள் பக்தர்களுக்கு அருள்பாலித்தார்.

மதுரை கூடலழகர் பெருமாள் கோயிலில் வைகாசி திருவிழா வருடந்தோறும் விமரிசையாக நடைபெறும்‌. அதன்படி இந்த ஆண்டுக்கான விழா நேற்று 5ம் தேதி கொடி யேற்றத்துடன் துவங்கியது. அன்று காலை 10.30 மணிக்குள் அலங்கரிக்கப்பட்ட கொடிமரத்தில் சிறப்பு பூஜைகள் செய்யப்பட்டு கொடியேற்றம் நடைபெற்றது. 14 நாட்கள் நடைபெறும் இந்த விழாவில் தினமும் காலை மாலையில் பல்வேறு வாகனங்களில் சுவாமி எழுந்தருளி அருள்பாலிக்கிறார். 10ம் தேதி நள்ளிரவு 12 மணிக்கு ஆண்டாள் சன்னதியில் மாலை மாற்றுதல் நிகழ்ச்சி நடக்கிறது. தேரோட்டம் 13ம் தேதி நடக்கிறது. பெருமாள் ஸ்ரீதேவி பூதேவியுடன் அலங்கரிக்கப்பட்ட தேரில் எழுந்தருளி காலை 6:15 மணிக்கு தேரோட்டம் நடக்கிறது. 14ம் திருத்தேர் தடம் பார்த்தல் நிகழ்ச்சியும், 15ம் தேதி காலையில் தீர்த்தவாரி முடிந்து குதிரை வாகன புறப்பாடு நடக்கிறது. அன்றிரவு தசாவதார நிகழ்ச்சி நடக்கிறது. 17ம் தேதி மாலையில் விடையாற்றி உற்சவமும், 18ம் தேதி உற்சவ சாந்தி, அலங்கார திருமஞ்சனத்துடன் விழா நிறைவு பெறுகிறது. விழா ஏற்பாடுகளை கோவில் தக்கார் ராமசாமி, உதவி ஆணையர் செல்வி மற்றும் பட்டர்கள், கோவில் ஊழியர்கள் செய்து வருகிறார்கள்.