கடலுார் : கடலுார், திருப்பாதிரிப்புலியூர் பாடலீஸ்வரர் கோவிலில் வைகாசிப் பெருவிழாவையொட்டி தெருவடைச்சான் உற்சவம் நடந்தது.

கடலுார், திருப்பாதிரிப்புலியூரில் பிரசித்திப் பெற்ற பாடலீஸ்வரர் கோவிலில் 10 நாட்கள் நடக்கும் வைகாசிப் பெருவிழா கடந்த 5ம் தேதி கொடியேற்றத்துடன் துவங்கியது. தினமும் காலை, மாலை வீதியுலா நடக்கிறது. 5ம் நாள் விழாவான நேற்று முன்தினம் காலை அதிகார கோபுர தரிசனம் நடந்தது. இரவு 12:00 மணிக்கு சோமாஸ் கந்தர், பராசக்தி அம்மன், வள்ளி தேவசேனா சமேத முருகர் சிறப்பு அலங்காரத்தில் எழுந்தருளச் செய்து தெருவடைச்சான் உற்சவம் நடந்தது. பக்தர்கள் திரளாக பங்கேற்று சுவாமி தரிசனம் செய்தனர். இன்று 11ம் தேதி இரவு 8:00 மணிக்கு திருக்கல்யாணம் நடக்கிறது.9ம் நாள் விழாவான 13ம் தேதி காலை 6:00 மணிக்கு தேரோட்டம், 14ம் தேதி காலை 9:00 மணிக்கு நடராஜர் திருக்கல்யாணம், 15ம் தேதி காலை 7:30 மணிக்கு திருஞானசம்பந்தர் திருக்குளத்தில் எழுந்தருளி ஞானப்பால் உண்ட ஐதீக நிகழ்ச்சி நடக்கிறது.