சாணார்பட்டி: சாணார்பட்டி அருகே மேட்டுக்கடை மல்லத்தான்பாறையில் உலக நன்மை வேண்டி பிரத்தியங்கிரா தேவி மிளகாய் யாகத்தில் திரளான பக்தர்கள் பங்கேற்றனர்.

இங்குள்ள ஆதி பரஞ்ஜோதி சகலோக சபை மடம், கோசாலையில் மாதந்தோறும் அமாவாசை தினத்தன்று சிறப்பு யாக பூஜை மற்றும் கோ பூஜை நடைபெறும். ஆனி அமாவாசையை முன்னிட்டு சபையின் நிர்வாகி திருவேங்கட ஜோதி பட்டாச்சாரியார் தலைமையில் பிரத்தியங்கிரா தேவி மிளகாய் யாக பூஜை நடந்தது. அங்குள்ள கலசங்களுக்கு பூக்களால் அலங்கரிக்கப்பட்டு சிறப்பு அபிஷேகம் நடந்தது, தொடர்ந்து யாக குண்டத்தில் வேத மந்திரங்கள் முழங்க மூட்டை மூட்டையாக மிளகாய் வத்தலை கொட்டி யாகம் நடைபெற்றது. முன்னதாக மாலை மடத்தில் வளர்க்கப்படும் 50க்கும் மேற்பட்ட மாடுகளுக்கு பக்தர்கள் உணவு வழங்கி கோ பூஜை நடத்தப்பட்டது. இந்த பூஜையின் சுற்று வட்டாரத்தில் இருந்தும் வெளி மாவட்டங்களில் இருந்தும் ஏராளமான பக்தர்கள் கலந்து கொண்டனர். தொடர்ந்து அனைவருக்கும் அன்னதானம் வழங்கப்பட்டது.