மயிலாடுதுறை : மயிலாடுதுறை: மயிலாடுதுறை அருகே பழைமை வாய்ந்த ஸ்ரீ அகிலாண்டேஸ்வரி அம்பிகா சமேத அக்னிபுரீஸ்வரர் கோவில் கும்பாபிஷேகம் நடைபெற்றது. தருமபுரம் ஆதீனம் கட்டளை தம்பிரான் சுவாமிகள் உள்ளிட்ட திரளான பக்தர்கள் சாமி தரிசனம் செய்தனர்.

மயிலாடுதுறை மாவட்டம் குளிச்சார்‌ ஊராட்சி அரும்பூர் கிராமத்தில் மிகவும் பழைமைவாய்ந்த ஸ்ரீ அகிலாண்டேஸ்வரி அம்பிகா சமேத அக்னிபுரீஸ்வரர் கோவில் உள்ளது. மிகவும் சித்தியடைந்த இக்கோவில் புனரமைக்கப்பட்டு அஷ்ட பந்தன மகா கும்பாபிஷேகம் இன்று வெகு விமர்சையாக நடைபெற்றது. முன்னதாக கும்பாபிஷேகத்தை முன்னிட்டு யாகசாலை அமைக்கப்பட்டு கடந்த 26 ஆம் தேதி கணபதி ஹோமத்துடன் முதல்கால யாகசாலை பூஜை தொடங்கியது. தினசரி யாகசாலை பூஜைகள் நடைபெற்றன. கும்பாபிஷேக தினமான இன்று நான்காம் கால யாகசாலை பூஜை நடைபெற்றது. இதில் மகா பூர்ணாஹூதி மற்றும் மகாதீபாராதனை செய்யப்பட்டு, பூஜிக்கப்பட்ட புனித நீர் அடங்கிய கடங்களை சிவாச்சாரியார்கள் தலையில் சுமந்து மேள தாளங்கள் முழங்க கோவிலை சுற்றி வலம் வந்து விமான கும்பத்தை அடைந்தனர். அங்கு வேத விற்பன்னர்கள் மந்திரங்கள் ஓத, வான வேடிக்கைகள் ஒலிக்க கும்பாபிஷேகம் நடைபெற்றது. தருமபுரம் ஆதீனம் கட்டளை தம்பிரான் சுவாமிகள் முன்னிலையில் நடைபெற்ற கும்பாபிஷேகத்தில்  ஏராளமான பக்தர்கள் கலந்து கொண்டு சாமி தரிசனம் செய்தனர். தொடர்ந்து பக்தர்களுக்கு அன்னதானம் வழங்கப்பட்டது.