ஸ்ரீவில்லிபுத்தூர்: ஸ்ரீவில்லிபுத்தூர் பெருமாள்பட்டி பத்திரகாளியம்மன் கோயில் புரட்டாசி பொங்கல் திருவிழாவில் புலி வேஷமிட்டு ஆட்டுக்குட்டியை வாயால் கவ்வி தூக்கும் நிகழ்வு பார்வையாளர்களை அசத்தியது. இக்கோயிலில் அக்டோபர் 11 முதல் துவங்கிய புரட்டாசி திருவிழாவில், பொங்கல் வைத்தல், முளைப்பாரி எடுத்தல் நிகழ்ச்சிகள் சிறப்புடன் நடந்தது. நேற்று முன்தினம் இரவு கோயில் முன்பு உள்ள மைதானத்தில் நூற்றுக்கும் மேற்பட்ட இளைஞர்கள் சிலம்பு கம்பு சுற்றினர். இதனையடுத்து கோபால் என்ற வாலிபர், புலி வேஷமிட்டு வாயால் ஆட்டுக்குட்டியை கவ்வி தூக்கி பார்வையாளர்களை அசத்தினார். விழா ஏற்பாடுகளை உறவின் முறை நிர்வாகிகள் செய்திருந்தனர்.