மயிலாடுதுறை:  திருவெண்காடு சுவேதாரண்யேஸ்வரர் சுவாமி கோவில் தை அமாவாசையை முன்னிட்டு சிறப்பு தீர்த்தவாரி நடைபெற்றது.

மயிலாடுதுறை மாவட்டம் சீர்காழி தாலுகா திருவெண்காடு கிராமத்தில் தேவார பாடல் பெற்ற பிரம்ம வித்யாம்பிகை சமேத ஸ்வேதாரண்யேஸ்வரர் சுவாமி கோவில் அமைந்துள்ளது. இக்கோவிலில் சிவபெருமானின் அவதாரங்களில் அகோர மூர்த்தியும், நவகிரகங்களில் ஞான காரகனான புதன் பெருமாளும் தனித்தனி சன்னதிகளில் எழுந்தருளி அருள் பாலித்து வருகின்றனர். இக்கோவிலில் சூரிய, சந்திர, அக்னி என மூன்று தீர்த்தங்கள் உள்ளன. அமாவாசை அன்று இந்த தீர்த்தங்களில் சுவாமி எழுந்தருள தீர்த்தவாரி நடைபெறுவது வழக்கம். தை அமாவாசையான இன்று சுவாமி, அம்பாள் தீர்த்தக் கரையில் எழுந்தருள அஸ்திர தேவருக்கு சிறப்பு அபிஷேக ஆராதனைகள் நடைபெற்றன. தொடர்ந்து அஸ்திர தேவர்  மூன்று தீர்த்தங்களிலும் தீர்த்தம் அளிக்கும்  தீர்த்தவாரி  நிகழ்ச்சி நடைபெற்றது  சந்திர தீர்த்தத்தில் சுவாமி தீர்த்தம் கொடுத்த போது திரளான பக்தர்கள் தீர்த்தத்தில் நீராடி சுவாமி அம்பாளை வழிபட்டனர். மேலும் தை அமாவாசையை முன்னிட்டு கோவிலில் அமைந்துள்ள ருத்ரபாதம் அருகே திரளானோர் தங்களது முன்னோர்களுக்கு தர்ப்பணம் கொடுத்து வழிபாடு நடத்தினர்.