தஞ்சாவூர்; கும்பகோணம் அருகே கொரநாட்டுக்கருப்பூர் அபிராமி அம்பிகா உடனுறை சுந்தரேஸ்வரர் சுவாமி கோவிலில் 70 லட்சம் ரூபாய் செலவில் தயாரிக்கப்பட்ட புதிய திருத்தேர் வெள்ளோட்டம் நடந்தது. இதில்  திரளான பக்தர்கள் கலந்துகொண்டு வடம் பிடித்து இழுத்தனர்.

தஞ்சாவூர் மாவட்டம் கும்பகோணம் அருகே கொரநாட்டுக்கருப்பூரில் பெட்டி காளியம்மன் என்று அழைக்கப்படும் அபிராமி அம்பிகா உடனுறை சுந்தரேஸ்வர சுவாமி கோவில் மிகவும் பழமையானது. இக்கோயிலில் ஆண்டும் வைகாசி மாதம் விசாக நட்சத்திர தினத்தில் தேரோட்டம் கடந்த 1943ம் ஆண்டு வரை நடந்துள்ளது. பின்னர் திருத்தேர் சிதிலமடைந்ததால் தேரோட்டம் தடைபட்டது. இதையடுத்து புதிய தேர் செய்ய சென்னையை சேர்ந்த உபயதாரர் மகாலெஷ்மி சுப்ரமணியன் ஏற்பாட்டில், கடந்த 2 ஆண்டுகளாக புதிய தேர் உருவாக்கப்பட்டு தேர் வெள்ளோட்டம் நடந்தது. தை முன்னிட்டு நேற்று  சிறப்பு யாகசாலை பூஜை தொடங்கப்பட்டு, இன்று காலை மூன்றாம் கால யாகசாலை பூர்ணாஹூதியுடன் நிறைவுபெற்றது. இதனை தொடர்ந்து யாகசாலையில் இருந்து புனித நீர் கலசங்களை மங்கலவாத்தியங்கள் முழங்க சிவாச்சாரியார்கள் கொண்டு சென்று திருத்தேரில் எழுந்தருள செய்தனர். 80 ஆண்டுகளுக்கு பிறகு நடந்த புதிய திருதேர் வெள்ளோட்டத்தை தருமபுர ஆதீனம் 27வது குருமகா சந்நிதானம் ஸ்ரீலஸ்ரீ மாசிலாமணி தேசிக பரமாசாரிய சுவாமிகள், சூரியனார்கோவில் ஆதீனம் 28வது குரு மகா சந்நிதானம் ஸ்ரீலஸ்ரீ மகாலிங்க தேசிக பரமாசாரிய சுவாமிகள் ஆகியோர் துவங்கி வைத்தனர். இதில் தேர் உபயதாரர் மகாலெஷ்மி சுப்ரமணியன், திருவடிக்குடில் சுவாமிகள் மற்றும் நுாற்றுக்கணக்கான பக்தர்கள் கலந்து கொண்டு வெள்ளோட்டத்தில் புதிய தேரை வடம் பிடித்தனர்.