மயிலாப்பூர்: மயிலாப்பூர், மாதவப் பெருமாள் கோவிலில், வரும் ஜூன் மாதம் கும்பாபிஷேகம் நடத்த திட்டமிடப்பட்டுள்ளது. சென்னையில் உள்ள வைணவ திருத்தலங்களில், மயிலாப்பூர் மாதவப் பெருமாள் கோவில் குறிப்பிடத்தக்கதாக விளங்குகிறது. இங்கு, நாள்தோறும் நுாற்றுக்கணக்கானோர் வந்து, சுவாமி தரிசனம் செய்வது வழக்கம். இந்த கோவிலில், புனரமைப்பு பணிகளை மேற்கொள்ள வேண்டும் என, கடந்த பல ஆண்டுகளாக, பக்தர்கள் கோரிக்கை விடுத்தனர். இதைத்தொடர்ந்து, இந்த கோவிலில் புதுப்பித்தல் மற்றும் பழுது பார்க்கும் பணி, கடந்த பிப்ரவரியில் துவங்கியது. ராஜகோபுரத்திற்கு சாரம் அமைக்கும் பணிகள் நிறைவு பெற்ற நிலையில், தற்போது கோவிலில் வண்ணம் பூசுவதற்கான வேலைகள் நடந்து வருகின்றன. இந்த புனரமைப்பு பணிகள், வரும் மே மாதத்தில் நிறைவு செய்யப்பட உள்ளன. இதையடுத்து, வரும் ஜூன் மாதத்தில், கும்பாபிஷேகம் நடத்த அறநிலையத்துறை திட்டமிட்டுள்ளது.