திருத்தணி: திரவுபதியம்மன் கோவிலில் நடந்து வரும் தீமிதி விழாவில், நேற்று காலையில் துரியோதனன் படுகளம் நிகழ்ச்சியும், மாலையில் தீமிதி விழாவும் நடந்தன.

திருத்தணி காந்தி நகர் திரவுபதியம்மன் கோவிலில், கொரோனா தொற்று காரணமாக, கடந்த மூன்று ஆண்டுகளுக்கு பின், தீமிதி திருவிழா கடந்த 23ம் தேதி கொடியேற்றத்துடன் துவங்கியது. தினமும், மதியம் மஹாபாரத சொற்பொழிவும், இரவில் நாடகமும் நடந்து வந்தது. மேலும், உற்சவர் அம்மன் திருவீதியுலா மற்றும் மூலவருக்கு சந்தன காப்பு, சிறப்பு அபிஷேகம் நடந்து வந்தது. விழாவின் நிறைவு நாளான நேற்று, காலை 10:00 மணிக்கு, துரியோதனன் படுகளம் நிகழ்ச்சி நடந்தது. தொடர்ந்து, திரளான பெண்கள் கோவில் வளாகத்தில் பொங்கல் வைத்து, அம்மனுக்கு படைத்து வழிபட்டனர். மதியம் 12:00 மணிக்கு, அக்னி குண்டத்தில் தீ மூட்டும் நிகழ்ச்சி நடந்தது. மாலை 6:00 மணிக்கு, உற்சவர் அம்மன் சிறப்பு அலங்காரத்தில் அக்னி குண்டம் முன் வந்து எழுந்தருளினார். அப்போது, ஐந்து ஆயிரத்திற்கும் மேற்பட்ட பக்தர்கள் காப்புக் கட்டி விரதம் இருந்து அக்னி குண்டத்தில் இறங்கி தீமிதித்தனர். தொடர்ந்து, வாணவேடிக்கை மற்றும் உற்சவர் அம்மன் ஊர்வலம் நடந்தது. விழாவில், திருத்தணி மற்றும் அதனை சுற்றியுள்ள பகுதியில் இருந்து, ஆயிரக்கணக்கான பக்தர்கள் பங்கேற்று வழிபட்டனர்.