மேட்டுப்பாளையம்: சிறுமுகை பாலசுப்பிரமணியர் கோவிலில், மண்டல பூஜை நாளை காலை (11ம் தேதி) நிறைவு விழா நடைபெறுகிறது. சிறுமுகை பழத்தோட்டத்தில், பவானி ஆற்றின் கரையோரம், ஆயிரம் ஆண்டுகள் பழமையான பாலசுப்பிரமணியர் கோவில் உள்ளது. இக்கோவில் கும்பாபிஷேகம் கடந்த மாதம், 24ம் தேதி நடந்தது. இதை அடுத்து, 48 நாட்கள் மண்டல பூஜை நடைபெற்று வருகிறது. ஒவ்வொரு நாளும் பாலசுப்பிரமணியருக்கு சிறப்பு அலங்காரம் செய்து, அபிஷேக பூஜை செய்து வருகின்றனர். நாளை (11ம் தேதி) மண்டல பூஜை நிறைவு விழா நடைபெறுகிறது. காலை, 5:30 மணிக்கு நடை திறந்து, மங்கல இசை இசைக்கப்படுகிறது. அதைத் தொடர்ந்து, 7:30 மணிக்கு சிறுமுகை மற்றும் சுற்று வட்டார ஊர்களில் இருந்து, பக்தர்கள் பால்குடம் எடுத்து வந்து, பாலசுப்பிரமணியருக்கு பால் அபிஷேகம் செய்யப்படுகிறது. காலை, 9:00 மணிக்கு, 108 வலம்புரி சங்கு வழிபாடு சிறப்பு வேள்வி பூஜைகள் நடைபெற உள்ளன. கோவை பேரூராதீனம் சாந்தலிங்க மருதாசல அடிகளார், சிரவை ஆதீனம் ராமானந்தா குமரகுருபர சுவாமிகள், ஓதிமலை ஆதீனம் சிவனேச அடிகளார் ஆகியோர் பங்கேற்று, சிறப்பு பூஜைகளை செய்ய உள்ளனர். இந்த விழாவில் ஏராளமான பக்தர்கள் பங்கேற்க உள்ளனர். விழா ஏற்பாடுகளை திருப்பணிகள் குழுவினர், கிருத்திகை வழிபாட்டு குழுவினர், ஊர் பொதுமக்கள் ஆகியோர் செய்து வருகின்றனர்.