திருப்பூர்;புதிய லோக்சபா கட்டடத்தில் வைக்க செங்கோல் வழங்கிய ஆதீனத்தை, திருக்கோவில் திருத்தொண்டர் அறக்கட்டளையினர் சந்தித்தனர்.

டில்லியில் அண்மையில் புதிய பார்லிமெண்ட் கட்டடம் திறக்கப்பட்டது. அதில், தமிழகத்தைச் சேர்ந்த திருவாவடுதுறை ஆதீனம் சார்பில், 1947ம் ஆண்டு, நாடு சுதந்திரம் அடைந்த போது வழங்கிய செங்கோல் தற்போது சபாநாயகர் இருக்கை அருகே அமைக்கப்பட்டுள்ளது. முன்னதாக, பிரயாக்ராஜ் மியூசியத்தில் இருந்த செங்கோலை புதுப்பித்து, திருவாவடுதுறை ஆதீனம் அம்பலவாண தேசிய பரமாச்சாரிய சுவாமிகள் தலைமையிலான குழுவினர், அதனை பிரதமர் மோடியிடம் வழங்கினர்.தற்போது திருவாவடுதுறை ஆதீனம் தென்னிந்தியா முழுவதும் சுற்றுப்பயணம் மேற்கொண்டுள்ளார். பிரதமரிடம் செங்கோலை வழங்கிய ஆதீனத்துக்கு, சிறப்பு செய்யும் நிகழ்ச்சி கேரளாவில் நடைபெற்றது. கோவை, பேரூரில் உள்ள கிளை மடத்துக்கு வருகை தந்த ஆதீனத்தை, திருக்கோவில் திருத்தொண்டர் அறக்கட்டளை நிர்வாகி கொங்கு ராமகிருஷ்ணன், டிவைன் பைன் ஆர்ட்ஸ் கிருத்திகாதேவி, கே.பி.ஆர்., கல்லுாரி தமிழ்த்துறை பேராசிரியர் கோகுல் ஆகியோர் சந்தித்து ஆசி பெற்றனர்.