சிங்கம்புணரி: சிங்கம்புணரி சேவுகப்பெருமாள் அய்யனார் கோயில் வைகாசி விசாகத் திருவிழா கொடியேற்றத்துடன் தொடங்கியது.

சிவகங்கை தேவஸ்தானத்துக்குட்பட்ட இக்கோயிலின் கும்பாபிஷேகம் ஜூன் 1ஆம் தேதி நடைபெற்றதை தொடர்ந்து இந்தாண்டு வைகாசி விசாக திருவிழா தாமதமாக தொடங்கியது.

முன்னதாக ஜூன் 15ஆம் தேதி கோயிலில் இருந்து விநாயகர் பாரம்பரிய முறைப்படி சிங்கம்புணரி கிராமத்தில் உள்ள சந்திவீரன் கூடத்தில் எழுந்தருளினார். அங்கு பத்து நாள் வழிபாட்டுக்கு பிறகு நேற்று காலை புறப்பட்டு மீண்டும் கோவிலுக்கு வந்தார். இதை தொடர்ந்து நேற்று மதியம் 2:00 மணிக்கு சேவுகப்பெருமாள் அய்யனார் மற்றும் பரிவார தேவதைகளுக்கு காப்பு கட்டப்பட்டு சிறப்பு வழிபாடு நடந்தது. 2:15 மணிக்கு பிடாரியம்மன் சன்னதியிலும் அதைத் தொடர்ந்து 2:30 மணிக்கு சேவுகப்பெருமாள் சன்னதியிலும் கொடி ஏற்றப்பட்டது. பத்து நாள் திருவிழாவாக ஒவ்வொரு நாளும் சுவாமி வீதி உலா நிகழ்ச்சி நடக்கிறது. ஜூன் 29ஆம் தேதி பூரணை புட்கலை உடனான சேவுகப்பெருமாளுக்கு திருக்கல்யாணம் நடக்கிறது. ஜூன் 30 ல் கழுவன் திருவிழா, ஜூலை 3ஆம் தேதி தேரோட்டம், ஜூலை 4ஆம் தேதி பூப்பல்லக்கு உற்சவம் நடக்கிறது. திருவிழாவிற்கான ஏற்பாடுகளை சிங்கம்புணரி கிராமத்தார்கள், தேவஸ்தான நிர்வாகிகள் செய்து வருகின்றனர்.