சென்னை, திருவல்லிக்கேணி பார்த்தசாரதி பெருமாள் கோவிலில், ஆனி மாத நரசிம்ம பிரம்மோற்சவம், கொடியேற்றத்துடன் நேற்று கோலாகலமாக துவங்கியது. திருவல்லிக்கேணி பார்த்தசாரதி பெருமாள் கோவில், 108 திவ்ய தேசங்களில் ஒன்று. இக்கோவிலில் ஆண்டுதோறும் பார்த்தசாரதி சுவாமிக்கு சித்திரை மாதமும், நரசிம்மருக்கு ஆனி மாதமும் பிரம்மோற்சவம் நடைபெறுவது வழக்கம். இந்த ஆண்டிற்கான நரசிம்ம பிரம்மோற்சவம், கொடியேற்றத்துடன் நேற்று துவங்கியது. இதை முன்னிட்டு, நேற்று முன்தினம் மாலை முளையிடுதல் விழா நடந்தது. நேற்று அதிகாலை 4:00 மணி முதல் 5:00 மணிக்குள், கொடியேற்ற விழா நடந்தது. விழாவின் இரண்டாம் நாளான இன்று இரவு, சிம்ம வாகனத்தில் உற்சவர் தெள்ளியசிங்கர் அருள்பாலிக்கிறார். நாளை, கருட சேவை உற்சவம் நடக்கிறது. பிரம்மோற்சவத்தின் ஐந்தாம் நாள் விழாவான ஜூலை, 1ம் தேதி காலை, பல்லக்கு நாச்சியார் திருக்கோலமும், மாலை யோக நரசிம்மன் திருக்கோல புறப்பாடும், இரவு அனுமந்த வாகன புறப்பாடும் நடக்கிறது. விழாவின் பிரதான நாளான, ஜூலை 3ம் தேதி, தேர் திருவிழா நடக்கிறது. அன்று காலை 7:15 மணிக்கு, பக்தர்களால் தேர் வடம் பிடிக்கப்படுகிறது. இரவு தோட்டத் திருமஞ்சனம் நடக்கிறது. ஜூலை 5ம் தேதி ஆளும் பல்லக்கு, தீர்த்தவாரி உற்சவம் நடக்கிறது. அன்று இரவு, அவரோஹணம் எனும் கொடியிறக்கத்துடன், விழா நிறைவு பெறுகிறது.