திண்டுக்கல் : திண்டுக்கல் அருகே தாடிக்கொம்பு சவுந்தரராஜ பெருமாள் கோயில் கும்பாபிஷேகம் கோலாகலமாக நடைபெற்றது.

தாடிகொம்பு சவுந்தரராஜ பெருமாள் கோயிலில் கும்பாபிஷேகம் 2009 ல் நடந்தது. திருப்பணிகள் முடிந்த நிலையில் இன்று காலை 9:35 மணி முதல் 10:35 மணிக்குள் கும்பாபிஷேகம் சிறப்பாக நடைபெறுகிறது.

முன்னதாக யாகசாலை துவங்கியது. நேற்று மதியம் 2:30 மணிக்கு சுவாமி, பரிவார மூர்த்திகளுக்கு 108 கலச ஸ்நபன திருமஞ்சனம், மாலை 5:30 மணிக்கு நான்காம் கால வேள்வி நடைபெற்றது. தொடர்ந்து இன்று காலை 5:30 மணிக்கு ஐந்தாம் கால வேள்வி, 9:00மணிக்கு மகா கும்பங்கள் புறப்பாடுடன், சுந்தரராஜ பெருமாள் விமானம், பைரவர், சக்கரத்தாழ்வார், நரசிம்மர், லட்சுமி நரசிம்மர், ஆண்டாள், ஆஞ்சநேயர் சன்னதி விமானங்களுக்கும் ஒரே நேரத்தில் பட்டாச்சாரியார்கள் புனித நீர் ஊற்ற மகா கும்பாபிஷேகம் கோலாகலமாக நடைபெற்றது. ஏராளமான பக்தர்கள் தரிசனம் செய்தனர். மாலை 4:30 மணிக்கு திருக்கல்யாணம், இரவு 8:30 மணிக்கு கருட வாகனத்தில் சுவாமி வீதி உலா நடக்கிறது. எஸ்.பி., பாஸ்கரன் தலைமையில் 3 ஏ.டி.எஸ்,பி., க்கள், 12 டி.எஸ்.பி., க்கள், 20 இன்ஸ்பெக்டர்கள், போலீசார் என 500 க்கும் மேற்பட்டோர் பாதுகாப்பு பணியில் ஈடுபடுத்தப்பட்டனர்.